Jasandy intellekt jastardyń kúndelikti ómirine ǵana emes, olardyń qarym-qatynasyna da enip keledi. «Kasperskii zerthanasynyń» zertteýine sáikes, álemdegi 18-28 jastaǵy zýmerlerdiń 27%-y JI-men dos retinde sóilesedi, dep habarlaidy ult.kz.
Zertteý nátijesine qaraǵanda, saýalnamaǵa qatysqan zýmerlerdiń 47%-y jasandy intellektti kún saiyn nemese kún saiyn derlik qoldanady. Olardyń 56%-y JI-di aqparat izdeý úshin, 49%-y oqý maqsatynda, 47%-y jańa ideialar qalyptastyrý úshin, al 39%-y jumys barysynda paidalanady.
Alaida jastardyń bir bóligi neirojelilerdi tek jumys nemese oqý quraly retinde emes, emotsionaldyq qoldaý kórsetetin áńgimelesýshi retinde de qabyldai bastaǵan.
Máselen, zýmerlerdiń 27%-y JI-men dos retinde sóilesetinin aitqan. Al 28%-y basqa adamdarmen bóliskisi kelmeitin jeke máselelerin jasandy intellektpen talqylaidy.
Bul kórsetkish basqa býyndarmen salystyrǵanda joǵary. Millenialdardyń 22%-y, X býynynyń 17%-y, al bebi-býmerlerdiń 11%-y JI-di dos retinde qabyldaidy.
JI-ge sezim paida bola ma?
Jasandy intellektpen emotsionaldyq bailanys ornatý týraly áńgime sońǵy ýaqytta jiilei tústi. Buǵan Japoniiada bolǵan erekshe oqiǵa mysal bola alady.
2025 jyly 32 jastaǵy japondyq Iýrina Nogýchi ChatGPT kómegimen ózi jasaǵan virtýaldy keiipkerge ǵashyq bolyp, onymen simvolikalyq túrde úilený toiyn ótkizgen. Áiel virtýaldy seriginiń atyn Klaýs dep qoiǵan. Úilený rásimi kezinde onyń beinesi smartfon ekrany men AR-kózildirik arqyly kórsetilgen.
Skrinshot: Reuters / YouTube
Bul neke zańdy kúshke ie emes. Degenmen oqiǵa adamdar men jasandy intellekt arasyndaǵy emotsionaldyq bailanystyń qanshalyqty tereńdeýi múmkin ekenin kórsetti.
Mamandardyń aitýynsha, mundai qarym-qatynasqa qyzyǵýshylyqtyń artýy tehnologiianyń adamnyń kúndelikti ómirindegi róliniń ózgerip jatqanyn kórsetedi.
Degenmen JI-ge tolyq senýge bolmaidy
«Kasperskii zerthanasynyń» zertteýinde jastardyń jasandy intellektti belsendi qoldanǵanymen, qaýipsizdik sharalaryn únemi saqtai bermeitini de anyqtalǵan.
Zýmerlerdiń tek 42%-y JI servisterin paidalanǵanda aqparatty basqa senimdi derekkózder arqyly tekserip, qupiia málimetterin jariialamaýǵa tyrysady. 52%-y qaýipsizdik sharalaryn tek keide qoldanady. Al 6%-y mundai saqtyqqa múlde mán bermeidi.
«Kasperskii zerthanasynyń» mashinalyq oqytý tehnologiialaryn zertteý tobynyń jetekshisi Vladislav Týshkanovtyń aitýynsha, jastar JI-di basqa býyndarǵa qaraǵanda belsendirek qoldanady. Biraq barlyq paidalanýshy jasandy intellektke tolyq senýge bolmaitynyn túsinýi kerek.
Onyń sózinshe, tipti iri servisterdiń ózinde derekterdiń taralyp ketýine ákelýi múmkin osaldyqtar bolýy yqtimal. Sondyqtan JI bergen aqparatty tekserip, jeke málimetterdi engizýde abai bolǵan jón.
Zertteýshiler JI servisterine qujattar, hat-habarlar, qupiiasózder, tólem derekteri jáne densaýlyqqa qatysty málimetter siiaqty qupiia aqparattardy júktemeýge keńes beredi. Sondai-aq jańa neirojelini paidalanbas buryn onyń qandai derekterdi jinaitynyn jáne bul aqparattyń qalai saqtalatynyn anyqtaý qajet.
JI bergen jaýaptardy, ásirese bilim, qarjy, quqyq jáne meditsina salalarynda, senimdi derekkózder arqyly qaita teksergen durys.
Aita keteiik, «Tsifrlyq ómir: trendter, táýekelder, múmkindikter» saýalnamasyn «Kasperskii zerthanasynyń» ishki zertteý ortalyǵy 2026 jylǵy naýryzda júrgizgen. Zertteýge 18 elden 7200 adam qatysqan. Olardyń qatarynda 18-28 jastaǵy zýmerler, 29-44 jastaǵy millenialdar, 45-60 jastaǵy X býyny jáne 61 jastan asqan bebi-býmerler bar.
