Soltústik Qazaqstan oblysynda elevatorda astyq keptirý kezinde eki jumysshy ainalyp turǵan mehanizmnen jaraqat alyp, aýrýhanaǵa jetkizildi, dep habarlaidy ult.kz.
SQO boiynsha memlekettik eńbek inspektsiiasy departamentiniń málimetinshe, oqiǵa 3 qyrkúiek kúni saǵat 16:00 shamasynda Dýbrovnoe aýylyndaǵy «Agrofirma Mamliýtskaia» JShS elevatorynda bolǵan.
Jumysshylar astyq keptirgish qondyrǵysynda dánniń keptirgishke úzdiksiz berilýin baqylaǵan. Sol sátte qondyrǵynyń joǵarǵy bóliginde júrgen slesardiń shalbarynyń balaǵy ainalyp turǵan bilikke ilinip ketken. Kiimi mehanizmge oralyp, jumysshy sol aiaǵynan ashyq synyq alǵan.
Oǵan kómek kórsetýge tyrysqan áriptesiniń de qoly mehanizmge túsip, oń jaq bilegi synǵan.
Oqiǵany baiqaǵan jumysshylar dereý elektr qýatyn óshirip, qondyrǵyny toqtatqan. Zardap shekkenderge alǵashqy meditsinalyq kómek kórsetilip, jedel járdem shaqyrylǵan. Eki jumysshy da aýrýhanaǵa jetkizildi.
Oqiǵa memlekettik eńbek inspektsiiasynyń baqylaýyna alyndy. Qazir óndiristegi jazataiym oqiǵanyń naqty sebepteri men barlyq mán-jaiy anyqtalyp jatyr.
Aita keteiik, buǵan deiin jyl basynan beri óndiriste 727 jumysshynyń zardap shekkenin habarlaǵan edik.
