Adamdy kóliktiń artyna bailap súirep bara jatqan video áleýmettik jelide taraǵan. Osyǵan bailanysty Pavlodar politseileri mán-jaidy anyqtap, arnaiy túsinikteme berdi, dep habarlaidy "Ult aqparat" Polisia.kz saityna silteme jasap.
Politseiler jan shoshyrlyq videony áleýmettik jelilerge monitoring kezinde Telegram-kanaldardyń birinen baiqaǵan.
«Atalǵan video boiynsha tekseris júrgizildi. Atap aitqanda, 11 mamyrda áleýmettik jelilerdi monitoringileý kezinde tártip saqshylary Pavlodar qalasynda Nazarbaev dańǵyly men Tolstoi kóshesiniń qiylysynda túsirilgen videony anyqtady. Onda avtokólik adamǵa uqsaityn áldeneni súirep bara jatqany kórinedi. Bul fakti Pavlodar qalasynyń Politsiia basqarmasynda tirkeldi. Anyqtalǵandai, video 2019 jyly Pavlodarda «AFA» filminiń túsirilimi kezinde jasalǵan. Avtokólikke adamnyń manekeni bailanǵan. Filmdi túsirý kezinde eshkim zardap shekken joq», – dep habarlady Pavlodar oblysy Politsiia departamenti bastyǵynyń birinshi orynbasary Jasqairat Qaiyrov.
Eske salaiyq, Pavlodarda «artyna adamdy bailap, súirep bara jatqan» kólik týraly video taraǵanyn buǵan deiin jazǵan bolatynbyz.
Politsiia atalǵan faktige qatysy bar tulǵalar men kýágerlerdi anyqtaýǵa birden kiristi. Sondai-aq oblystyq Politsiia departamenti videony túsirgen kýágerlerden «102» nemese 87774586688 nómirine habarlasýdy surady. Qupiialylyq saqtalatynyna kepildik berildi.
