"Ótirik ǵumyr keshýdi ómir súrýdiń negizgi tiregine ainaldyryp alǵan búgingi qiturqy adamdardyń ainymas qubylysyn kórip júregiń ainidy. El ishindegi shekten shyqqan paraqorlyq pen ádiletsizdik, mansaptyń taǵy úshin maqtanǵa salynyp, basynyń baǵy úshin ar-uiatyn saýdaǵa salyp jaǵympazdyqtyń jarapazanyn aityp júrgen "jasampazdardy" kórgende "apyr-ai, jumyr jer nege jyrtylyp ketpei shydap tur" degen oiǵa qalasyń. Qulaǵyn satqandardan Qudai atqandardyń súldesin kórip sasqanymnan kúńirenem de kúrsinem", - dep edi Sofy aǵa bir sózinde.
Kerekke jaramaityndardy keremet tutqan búgingi qomaǵai-qoǵam kómeii búlkildegenniń bárin -sheshen, kóptiń ústinen zirkildegenniń bárin kósem etip qoidy. Kólgirsip sóilep kóptiń kóńilin aýlaityn jyltyrlar kóbeidi. Azamattyq pozitsiianyń joqtyǵy men tapshylyǵy muńaitady. Ultynyń janyn uqpai uly bolǵysy keletinderin qaitesiz! Ult bar jerde ulttyq problemanyń bolmai qalýy múmkin emes. Elimizdiń jaqsylyǵyna qýanamyz, jamanyna nege kóz salmaimyz, nege janymyz ashymaidy?!
Kóp nárseni saiasatpen bailanystyra salǵymyz keledi, ol saiasat emes, azamattyq boryshymyz emes pe? Bir oishyldyń: "Adamzat balasy zańnyń emes, salt-dástúrdiń "quly" bolǵan kezde baqytty ómir bastalady" degenin oqyp edim. Rasynda da solai! Biz úlkenin ardaqtaǵan, salt-jorasyn salmaqtaǵan, dástúrim - dáýletim, ǵurpym - ǵumyrym, saltym sanam dep ósken tekti ulttyń urpaǵy edik qoi. Búginde salt-dástúrmen sanasýdan góri zańnan ǵana qorqý, syrt kózden ǵana qaimyǵý basym. Dástúrli ómir saltymyzdan jańylyp, ata-babamyz qalyptastyrǵan ultymyzdyń eń tamasha qasietteriniń biri bolyp tabylatyn adamdar arasyndaǵy ózara kisilik, úlken men kishiniń, týys pen týǵannyń, jat pen jaqynnyń, erkek pen áieldiń qatynas qalyptarynyń shyrqyn buzyp aldyq.
Qazaqtyń kez kelgen ulttyq ádet-ǵurpynda kisilik, adamgershilik, meiirim bar edi. "Tyiym kórmegen baladan teksiz shyǵady. Tekteý adamdy ádeptilikke úiretedi". Mine, qazaqtyń tól tárbiesiniń ozyq úlgisi. "Uiat bolady" men "obal boladyny" balasynyń sanasyna tái-tái basqannan, alǵash byldyrlai bastaǵannan sińirip kelgen qazaq búginde tyiym men tekteýdi umytty.
Qazirgi bala jaltaq qoǵamnyń jaǵympaz adamdarynan qandai tárbie kórip otyr? Kórseter ónegemiz qaisy? Osynyń bári, ainalyp kelgende, ulttyq minez-bolmysymyzdy joǵaltyp alǵanymyzdyń kesiri. Dástúrli nanym men senimge moiynsynbaǵan soń, salt-dástúrdi saqtamaǵan soń kórgensizdikke boi aldyryp, tatýlyqty qatýlyqpen iritip júrmiz. Baiaǵy baýyrmal kóńil, qazaqy qaiyrymdylyq joq. Qýlyq pen sumdyqtyń qudyǵyna súiregen qýaiaq, sumaýyz bolyp baramyz. Ózekti órtegen osy oilar kóńilge tynym, júrekke maza bermeid|.
Bekjan Turystyń feisbýktaǵy jazbasynan
