Ánshi Sáken Maiǵaziev marqum anasyna arnalǵan qonaqasynda estelikterimen bólisip, kózine jas aldy. Jiynnan túsirilgen videony Altynai Jorabaeva áleýmettik jelidegi paraqshasynda jariialady, dep habarlaidy ult.kz.

Óner iesi anasynyń densaýlyǵy álsiregenge deiin qulshylyǵyn úzbegenin aityp, onyń ónegeli ómirin eske aldy.

"Anamyz densaýlyǵy syr berip, sájdege bara almai qalǵanǵa deiin namaz oqydy. Allanyń buiyrǵan bes paryzyn buljytpai oryndady desem, artyq aitpaimyn. Alla bilýshi. Qajylyqqa 2014 jyly Nurlan aǵammen birge baryp keldi. Men baqytty urpaqtardyń birimin", - dedi Sáken Maiǵaziev.

Altynai Jorabaeva áriptesine kóńil aityp, marqumnyń rýhyna duǵa baǵyshtady.

"Sáken aǵa, anańyzdyń jany jánnattyń tórinde shalqysyn", – dep jazdy ánshi.

Ónerdegi ózge áriptesteri de áleýmettik jeli arqyly Sáken Maiǵaziev pen onyń otbasyna kóńil aityp, qoldaý bildirip jatyr.

Aita keteiik, Sáken Maiǵaziev Arman Dúisenovti eske aldy.

Sáken Maiǵaziev kim?

Sáken Qordabaiuly Maiǵaziev – qazaqstandyq estrada ánshisi, «MýzART» tobynyń múshesi, Qazaqstannyń eńbek sińirgen qairatkeri. Ol 1975 jyly 1 qańtarda qazirgi Túrkistan oblysynyń Sozaq aýdanynda dúniege kelgen. 2001 jyldan bastap «MýzART» tobynyń quramynda óner kórsetip, kópshilikke keńinen tanyldy. 

Ánshi kásibi bilimin Júsipbek Elebekov atyndaǵy respýblikalyq estrada jáne tsirk kolledjinde alyp, keiin Temirbek Júrgenov atyndaǵy óner akademiiasynda oqýyn jalǵastyrǵan. Ánshilikpen qatar ustazdyqpen jáne telejúrgizýshilikpen ainalysqan. «Eki juldyz» jobasyna qatysyp, keiin baǵdarlamany júrgizdi. Sondai-aq «Habar» arnasyndaǵy «Jańa kún» baǵdarlamasynyń júrgizýshisi boldy. 2013 jyly oǵan «Qazaqstannyń eńbek sińirgen qairatkeri» ataǵy berildi.