Qarjy sarapshysy Andrei Chebotarev rýblmen birge álsirep jatqan tól valiýtanyń bolashaǵy týraly pikir bildirdi, dep habarlaidy QazAqparat.
«Teńge quldyrap jatyr, óitkeni bizdiń ekonomika Resei ekonomikasymen bailanysty. Bizdegi búkil importtyń 40%-y, iaǵni Qazaqstan satyp alatyn árbir ekinshi taýar bizge Resei Federatsiiasynan keledi. Biz bul taýarlardyń kóbin rýblge satyp alamyz. Tranzaktsiianyń 60%-dan astamy rýblmen júredi. Bul bizdiń ekonomikamyzdy rýbl baǵamyna táýeldi etedi. Sondyqtan tól valiýtamyz reseilik valiýtamen birge qunsyzdanyp jatyr. Bul - birinshi faktor.
Ekinshi faktor – valiýta naryǵyndaǵy baibalam. Jasyratyny joq, bizde qandai da bir dúrbeleń týyndaǵan jaǵdaida shottaǵy aqshanyń bárin sheship alyp, tipti jaqyndarynan qaryz alyp dollarǵa aiyrbastai ketetinder kóp. Ózimizdiń ulttyq valiýtaǵa degen senimniń tómendigi onyń baǵamyna nuqsan keltiredi. Suranys usynysqa qysym jasaidy», - deidi Andrei Chebotarev.
Spiker sondai-aq teńge baǵamy ári qarai qalai qubylatynyn aitty.
«Bul áskeri qaqtyǵys qalai órbitinine bailanysty. Qazir bári saǵat saiyn ózgerip tur. Beisenbide engizilgen sanktsiialar óte jeńil bolyp kóringen, al demalys kúnderi onyń sońy álemde buryn-sońdy bolmaǵan sanktsiialarǵa ulasty. Sondyqtan bul jerde bizge eshteńe bailanysty emes», - dedi ol.
Andrei Chebotarevtiń oiynsha, qazirgi baǵamen sheteldik valiýtany satyp alý tiimsiz.
«Qazir dollar satyp alý kerek pe? Ony árkim ózi sheshýi kerek. Biraq men qaryzǵa alǵan aqshamen valiýta satyp almaýǵa keńes beremin. Iaǵni naryqty aldaý úshin nesie alýdyń reti joq. 99% jaǵdaida moinyńyzda qaryz qalady. Eger búgin satyp alǵyńyz kelse, birjanyń ashylýyn, iaǵni, 15:00-ge deiin kútýge keńes beremin. Sol kezde resmi aiyrbastaý baǵamy bekitiledi. Qazir siz banktik qosymshalar men almastyrǵyshtardan kórip otyrǵanyńyz – alypsatarlyq kýrs qana. Ol eshqandai naqty erejelerge sáikes kelmeidi», - dep jaýap berdi sarapshy.
