قارجى ساراپشىسى اندرەي چەبوتارەۆ رۋبلمەن بٸرگە ەلسٸرەپ جاتقان تٶل ۆاليۋتانىڭ بولاشاعى تۋرالى پٸكٸر بٸلدٸردٸ, دەپ حابارلايدى قازاقپارات.
«تەڭگە قۇلدىراپ جاتىر, ٶيتكەنٸ بٸزدٸڭ ەكونوميكا رەسەي ەكونوميكاسىمەن بايلانىستى. بٸزدەگٸ بٷكٸل يمپورتتىڭ 40%-ى, ياعني قازاقستان ساتىپ الاتىن ەربٸر ەكٸنشٸ تاۋار بٸزگە رەسەي فەدەراتسيياسىنان كەلەدٸ. بٸز بۇل تاۋارلاردىڭ كٶبٸن رۋبلگە ساتىپ الامىز. ترانزاكتسييانىڭ 60%-دان استامى رۋبلمەن جٷرەدٸ. بۇل بٸزدٸڭ ەكونوميكامىزدى رۋبل باعامىنا تەۋەلدٸ ەتەدٸ. سوندىقتان تٶل ۆاليۋتامىز رەسەيلٸك ۆاليۋتامەن بٸرگە قۇنسىزدانىپ جاتىر. بۇل - بٸرٸنشٸ فاكتور.
ەكٸنشٸ فاكتور – ۆاليۋتا نارىعىنداعى بايبالام. جاسىراتىنى جوق, بٸزدە قانداي دا بٸر دٷربەلەڭ تۋىنداعان جاعدايدا شوتتاعى اقشانىڭ بەرٸن شەشٸپ الىپ, تٸپتٸ جاقىندارىنان قارىز الىپ دوللارعا ايىرباستاي كەتەتٸندەر كٶپ. ٶزٸمٸزدٸڭ ۇلتتىق ۆاليۋتاعا دەگەن سەنٸمنٸڭ تٶمەندٸگٸ ونىڭ باعامىنا نۇقسان كەلتٸرەدٸ. سۇرانىس ۇسىنىسقا قىسىم جاسايدى», - دەيدٸ اندرەي چەبوتارەۆ.
سپيكەر سونداي-اق تەڭگە باعامى ەرٸ قاراي قالاي قۇبىلاتىنىن ايتتى.
«بۇل ەسكەري قاقتىعىس قالاي ٶربيتٸنٸنە بايلانىستى. قازٸر بەرٸ ساعات سايىن ٶزگەرٸپ تۇر. بەيسەنبٸدە ەنگٸزٸلگەن سانكتسييالار ٶتە جەڭٸل بولىپ كٶرٸنگەن, ال دەمالىس كٷندەرٸ ونىڭ سوڭى ەلەمدە بۇرىن-سوڭدى بولماعان سانكتسييالارعا ۇلاستى. سوندىقتان بۇل جەردە بٸزگە ەشتەڭە بايلانىستى ەمەس», - دەدٸ ول.
اندرەي چەبوتارەۆتٸڭ ويىنشا, قازٸرگٸ باعامەن شەتەلدٸك ۆاليۋتانى ساتىپ الۋ تيٸمسٸز.
«قازٸر دوللار ساتىپ الۋ كەرەك پە? ونى ەركٸم ٶزٸ شەشۋٸ كەرەك. بٸراق مەن قارىزعا العان اقشامەن ۆاليۋتا ساتىپ الماۋعا كەڭەس بەرەمٸن. ياعني نارىقتى الداۋ ٷشٸن نەسيە الۋدىڭ رەتٸ جوق. 99% جاعدايدا موينىڭىزدا قارىز قالادى. ەگەر بٷگٸن ساتىپ العىڭىز كەلسە, بيرجانىڭ اشىلۋىن, ياعني, 15:00-گە دەيٸن كٷتۋگە كەڭەس بەرەمٸن. سول كەزدە رەسمي ايىرباستاۋ باعامى بەكٸتٸلەدٸ. قازٸر سٸز بانكتٸك قوسىمشالار مەن الماستىرعىشتاردان كٶرٸپ وتىرعانىڭىز – الىپساتارلىق كۋرس قانا. ول ەشقانداي ناقتى ەرەجەلەرگە سەيكەس كەلمەيدٸ», - دەپ جاۋاپ بەردٸ ساراپشى.
