Bilim jáne ǵylym ministrligi tórt ret ótkiziletin UBT-nyń «kóktemgi» qorytyndysyn jariialady, dep habarlaidy QazAqparat.
Ministrliktiń habarlaýynsha, talapkerler úshin jazǵy testileýden bólek Ulttyq biryńǵai testileýdi qańtar, naýryz, tamyz ailarynda tapsyrý múmkindigi berilgeni málim. JOO-nyń aqyly bólimine oqýǵa túsý úshin talapkerge jylyna 4 ret ótkiziletin UBT-nyń kez-kelgenine qatysyp, shekti bal jinaý jetkilikti. Al, memlekettik bilim berý granttaryn taǵaiyndaý boiynsha ótetin konkýrsqa qatysý úshin mindetti túrde maýsym aiynda ótetin Ulttyq biryńǵai testileýge qatysý qajet.
«Elimiz boiynsha 27-29 naýryz aralyǵynda testileý ótkizýdiń 133 pýnktinde «kóktemgi» UBT bolyp ótti. Testileýge 78 133 adam qatysty, bul kórsetkish testileýge qatysýǵa ótinish berýshilerdiń 97,6 paiyzyn qurady (onyń ishinde 61 367 (78,5 paiyzy) qazaq tilinde, 16 515 (21,1 paiyzy) orys tilinde jáne 251 aǵylshyn tilinde tapsyrdy). Shekti deńgeiden ótkender sany - 58 317 (74,6 paiyz), shekti deńgeiden óte almaǵandar sany - 19 816 adam (25,4 paiyz). «Kóktemgi» UBT-nyń eń joǵary baly - 138. UBT nátijelerine sáikes, bes pán boiynsha ortasha bal 70,5 baldy qurady», - dep habarlaidy ministrlikten.
UBT-nyń ótkizý erejesin buzǵany jáne tyiym salynǵan zattardy qoldanǵany úshin testileýden 235 adam shyǵarylǵan. Al, testileýge qatysqan 14 múmkindigi shekteýli jan úshin memlekettik komissiia sheshimimen jeke aýditoriialar jáne arnaiy kómekshiler bólingen.
«UBT qatysýshylarynyń kóp bóligi, atap aitsaq 23 691 adam (30,3 paiyzy) «Matematika-Fizika» beiindik pánder kombinatsiiasyn tańdap alsa, al 15 596 (20,0 paiyzy) testilenýshi «Himiia-Biologiia» kombinatsiiasyn tańdaǵan. Al, eń az tańdalǵan pánder kombinatsiiasy «Himiia-Fizika» - 225 adam. UBT qorytyndysy boiynsha respýblikalyq apelliatsiialyq komissiiaǵa testileýdiń mazmuny boiynsha kelip túsken ótinishterdiń birde bireýi qanaǵattandyrylǵan joq», - delingen habarlamada.
Aita ketken jón, memlekettik bilim berý grantyn ielenýge úmittengen talapkerler 2019 jylǵy maýsym aiynda ótetin UBT-ny mindetti túrde tapsyrýy qajet. Óitkeni, naýryz aiyndaǵy testileýde shekti bal jinaǵan testilenýshi bul sertifikatymen JOO-da tek aqyly negizde oqi alady. Osylaisha, naýryz aiyndaǵy Ulttyq biryńǵai testileý túlekterge negizgi testileýdiń aldynda óz bilimderin tekserý úshin qosymsha múmkindik berip otyr.
«Sondai-aq, 2019 jylǵy UBT formaty esh ózgerissiz qalady. Oqýǵa túsýshi dástúrli túrde 3 mindetti pán (Qazaqstan tarihy, matematikalyq saýattylyq, oqý saýattylyǵy) jáne 2 beiindik pán boiynsha testileýden ótedi», - dep habarlaidy QR BǴM baspasóz qyzmetinen.
Eske sala ketsek, Ulttyq testileý ortalyǵy naýryz aiynda 80 myńnan astam túlek Ulttyq biryńǵai testileýden ótetinin jariia etken edi.
