بٸلٸم جەنە عىلىم مينيسترلٸگٸ تٶرت رەت ٶتكٸزٸلەتٸن ۇبت-نىڭ «كٶكتەمگٸ» قورىتىندىسىن جارييالادى, دەپ حابارلايدى قازاقپارات.
مينيسترلٸكتٸڭ حابارلاۋىنشا, تالاپكەرلەر ٷشٸن جازعى تەستٸلەۋدەن بٶلەك ۇلتتىق بٸرىڭعاي تەستٸلەۋدٸ قاڭتار, ناۋرىز, تامىز ايلارىندا تاپسىرۋ مٷمكٸندٸگٸ بەرٸلگەنٸ مەلٸم. جوو-نىڭ اقىلى بٶلٸمٸنە وقۋعا تٷسۋ ٷشٸن تالاپكەرگە جىلىنا 4 رەت ٶتكٸزٸلەتٸن ۇبت-نىڭ كەز-كەلگەنٸنە قاتىسىپ, شەكتٸ بال جيناۋ جەتكٸلٸكتٸ. ال, مەملەكەتتٸك بٸلٸم بەرۋ گرانتتارىن تاعايىنداۋ بويىنشا ٶتەتٸن كونكۋرسقا قاتىسۋ ٷشٸن مٸندەتتٸ تٷردە ماۋسىم ايىندا ٶتەتٸن ۇلتتىق بٸرىڭعاي تەستٸلەۋگە قاتىسۋ قاجەت.
«ەلٸمٸز بويىنشا 27-29 ناۋرىز ارالىعىندا تەستٸلەۋ ٶتكٸزۋدٸڭ 133 پۋنكتٸندە «كٶكتەمگٸ» ۇبت بولىپ ٶتتٸ. تەستٸلەۋگە 78 133 ادام قاتىستى, بۇل كٶرسەتكٸش تەستٸلەۋگە قاتىسۋعا ٶتٸنٸش بەرۋشٸلەردٸڭ 97,6 پايىزىن قۇرادى (ونىڭ ٸشٸندە 61 367 (78,5 پايىزى) قازاق تٸلٸندە, 16 515 (21,1 پايىزى) ورىس تٸلٸندە جەنە 251 اعىلشىن تٸلٸندە تاپسىردى). شەكتٸ دەڭگەيدەن ٶتكەندەر سانى - 58 317 (74,6 پايىز), شەكتٸ دەڭگەيدەن ٶتە الماعاندار سانى - 19 816 ادام (25,4 پايىز). «كٶكتەمگٸ» ۇبت-نىڭ ەڭ جوعارى بالى - 138. ۇبت نەتيجەلەرٸنە سەيكەس, بەس پەن بويىنشا ورتاشا بال 70,5 بالدى قۇرادى», - دەپ حابارلايدى مينيسترلٸكتەن.
ۇبت-نىڭ ٶتكٸزۋ ەرەجەسٸن بۇزعانى جەنە تىيىم سالىنعان زاتتاردى قولدانعانى ٷشٸن تەستٸلەۋدەن 235 ادام شىعارىلعان. ال, تەستٸلەۋگە قاتىسقان 14 مٷمكٸندٸگٸ شەكتەۋلٸ جان ٷشٸن مەملەكەتتٸك كوميسسييا شەشٸمٸمەن جەكە اۋديتورييالار جەنە ارنايى كٶمەكشٸلەر بٶلٸنگەن.
«ۇبت قاتىسۋشىلارىنىڭ كٶپ بٶلٸگٸ, اتاپ ايتساق 23 691 ادام (30,3 پايىزى) «ماتەماتيكا-فيزيكا» بەيٸندٸك پەندەر كومبيناتسيياسىن تاڭداپ السا, ال 15 596 (20,0 پايىزى) تەستٸلەنۋشٸ «حيمييا-بيولوگييا» كومبيناتسيياسىن تاڭداعان. ال, ەڭ از تاڭدالعان پەندەر كومبيناتسيياسى «حيمييا-فيزيكا» - 225 ادام. ۇبت قورىتىندىسى بويىنشا رەسپۋبليكالىق اپەللياتسييالىق كوميسسيياعا تەستٸلەۋدٸڭ مازمۇنى بويىنشا كەلٸپ تٷسكەن ٶتٸنٸشتەردٸڭ بٸردە بٸرەۋٸ قاناعاتتاندىرىلعان جوق», - دەلٸنگەن حابارلامادا.
ايتا كەتكەن جٶن, مەملەكەتتٸك بٸلٸم بەرۋ گرانتىن يەلەنۋگە ٷمٸتتەنگەن تالاپكەرلەر 2019 جىلعى ماۋسىم ايىندا ٶتەتٸن ۇبت-نى مٸندەتتٸ تٷردە تاپسىرۋى قاجەت. ٶيتكەنٸ, ناۋرىز ايىنداعى تەستٸلەۋدە شەكتٸ بال جيناعان تەستٸلەنۋشٸ بۇل سەرتيفيكاتىمەن جوو-دا تەك اقىلى نەگٸزدە وقي الادى. وسىلايشا, ناۋرىز ايىنداعى ۇلتتىق بٸرىڭعاي تەستٸلەۋ تٷلەكتەرگە نەگٸزگٸ تەستٸلەۋدٸڭ الدىندا ٶز بٸلٸمدەرٸن تەكسەرۋ ٷشٸن قوسىمشا مٷمكٸندٸك بەرٸپ وتىر.
«سونداي-اق, 2019 جىلعى ۇبت فورماتى ەش ٶزگەرٸسسٸز قالادى. وقۋعا تٷسۋشٸ دەستٷرلٸ تٷردە 3 مٸندەتتٸ پەن (قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى) جەنە 2 بەيٸندٸك پەن بويىنشا تەستٸلەۋدەن ٶتەدٸ», - دەپ حابارلايدى قر بعم باسپاسٶز قىزمەتٸنەن.
ەسكە سالا كەتسەك, ۇلتتىق تەستٸلەۋ ورتالىعى ناۋرىز ايىندا 80 مىڭنان استام تٷلەك ۇلتتىق بٸرىڭعاي تەستٸلەۋدەن ٶتەتٸنٸن جارييا ەتكەن ەدٸ.
