Qazaqstanda Qoǵamdyq keńesterdiń múshelerin merziminen buryn alyp tastaýǵa bolady. Bul týraly QR Parlamenti Májilisinde ótken dóńgelek ústel otyrysynda aityldy, dep habarlaidy "Ult aqparat".
Atalǵan sharada QR Aqparat jáne qoǵamdyq damý vitse-ministri Bolat Tilepov «Qazaqstan Respýblikasynyń keibir zańnamalyq aktilerine qoǵamdyq keńesterdiń qyzmeti máseleleri boiynsha ózgerister men tolyqtyrýlar engizý týraly» Zań jobasynyń negizgi erejelerin tanystyrdy.
Is-sharaǵa Parlament depýtattary, ortalyq jáne jergilikti memlekettik organdardyń Qoǵamdyq keńesteriniń basshylary, memlekettik organdardyń, ÚEU-niń ókilderi jáne sarapshylar qatysty.
Qoǵamdyq keńester qyzmetiniń máseleleri boiynsha talqylaýǵa usynylǵan úkimettik túzetýler 2019 jylǵy qarashadan bastap Májilistiń qaraýynda jatyr. Osyǵan bailanysty depýtat Qanat Mýsin qoǵamdyq keńester qoǵam men bilik arasynda syndarly bailanys ornaǵanyn, sondai-aq, búginde elimizde 200-den astam Qoǵamdyq keńes qurylǵanyn atap ótti.
«Bizdiń azamattarymyzdyń baǵalaýy boiynsha Qoǵamdyq keńester qoǵamdyq pikir bildirýdiń jáne qoǵam men bilik arasyndaǵy dialogtyń derbes jáne mańyzdy institýty retinde qalyptasty», - dep atap ótti depýtat.
Aita keteiik, zań jobasy jergilikti deńgeide sandyq quramdy jáne respýblikalyq deńgeide qoǵamdyq keńester quramynyń sandyq parametrlerin belgileý boiynsha biryńǵai tásildi usynady. Qoǵamdyq tyńdaýlardy, qoǵamdyq saraptamany, qoǵamdyq monitoringti, memlekettik organdar basshylarynyń esepterin uiymdastyrý jáne ótkizý tártibin normativtik bekitý usynylady.
«Qoǵamdyq keńesterge qajet bolǵan jaǵdaida qoǵamdyq baqylaýdyń ártúrli formalaryn júrgizý úshin táýelsiz sarapshylardy tartý múmkindigin berý usynylady. Zań jobasynda qoǵamdyq keńester salasyndaǵy ýákiletti organdy aiqyndaý arqyly memleket pen Qoǵamdyq keńesterdiń ózara is-qimyl jasaý tetigi belgilenedi, onyń quzyretine qoǵamdyq keńesterdiń qyzmetin úilestirýdi jáne ádistemelik qamtamasyz etýdi júzege asyrý kiredi. Bul organǵa Memleket basshysyna Qoǵamdyq keńesterdiń qyzmeti týraly jyl saiynǵy Ulttyq baiandamany daiyndaý jáne engizý boiynsha ókilettikter beriletin bolady», - dedi Bolat Tilepov.
Aita keteiik, Qazaqstanda túrli deńgeidegi 234 Qoǵamdyq keńes jumys isteidi. Respýblikalyq deńgeide – 18 Qoǵamdyq keńes, óńirlik deńgeide – 216 keńes (oblystar deńgeiinde, Nur-Sultan men Almaty, Shymkentte – 17, qalalar men aýdandar deńgeiinde – 199).
