Qorǵanys ministrligi eńbek dinastiialaryn qurý úshin jastardy kásiporyndarǵa tartyp, olardyń praktikalyq bilimin jetildirýdi basym baǵytqa qoiyp otyr. Bul týraly búgin qorǵanys jáne aeroǵarysh ónerkásibi kesheni ministri Beibit Atamqulov májiliste ótken úkimet saǵatynda málimdedi, dep habarlaidy Sputnik Qazaqstan tilshisi.
"Búginde otandyq qorǵanys ónerkásibi kesheni elektrondy, aqparattyq, ǵarysh tehnologiialaryn biriktiredi. Taiaý arada biz ekonomikanyń ǵylymdy qajet etetin ónerkásip sektorlarynyń birine ainala alamyz. Bizdiń alańdarda jańa tehnologiialyq innovatsiialyq sheshimder synaqtan ótkiziledi. Biz qazir bul baǵytta jumys istep jatyrmyz", — dedi ministr.
Atamqulov qorǵanys ónerkásibiniń damýy sol salada isteitin jumysshylardyń bilimi men biliktiligine bailanysty ekenin atap ótti.
"Jastardy oqytý, kásiporyndarda kásibi kadrlar daiarlaý, joǵary tehnologiialyq salanyń tiregine ainalatyn eńbek dinastiialaryn qurý – bizdiń basym baǵyttarymyzdyń biri. Biz taldaý jasadyq, qazir tálimgerlikkke oralyp jatyrmyz. Tálimgerlerdi yntalandyryp, qorǵanys ónerkásibi kesheninde kadrlyq áleýetti saqtaý úshin barymyzdy salýdamyz", — dedi vedomstvo basshysy.
Ministrdiń aitýynsha, qiyn-qystaý jyldary Qazaqstan kóptegen bilikti mamanynan aiyryldy.
"Ókinishke qarai, qiyn-qystaý jyldary biz kóp aqyldy adamdy joǵalttyq: jer aýdardy, zeinetke shyqty, sóitip artynan ergen jastarmen tájiribesimen bólise almady. Kásiporyndarǵa paidany ǵana kózdegen, tez baiyp shyǵýdy oilaǵan menedjerler kelgen ýaqyt na boldy. Desek te, elin súigen úzdik patriot kadrlar qaldy. Olar qiyndyqqa tózip, bárine shydap, búginde solardyń arqasynda kásiporyndarymyz jumys istep tur", — dep túiindedi sózin Atamqulov.
