«Memleket basshysy «Kitap oqityn ult» baǵdarlamasyn jariialaǵaly beri bul taqyryp kún tártibinen túspei keledi. Osy oraida jýrnalist Erjan Jaýbai áleýmettik jelidegi jazbasynda osy máseleni qozǵap, kitap oqýdyń artyqshylyqtary men uzaq mátinderden alshaqtaýdyń yqtimal saldaryn taldaǵan. Onyń pikirinshe, kitaptyń ózi emes, adamnyń aqparatty qandai jolmen jáne qanshalyqty tereń tutynatyny mańyzdy. Avtor kitap oqýdyń sózdik qordy damytý, oilaý qabiletin jetildirý, zeiin men shyǵarmashylyqty qalyptastyrý siiaqty birneshe artyqshylyǵyna toqtalǵan, dep habarlaidy ult.kz.
Ol ózi baiqaǵan kitap oqýdyń 7 paidasyn jazypty:
1. Sózdik qoryńyzdy modaitady. Kóp oqý adamnyń jańa sózder men tildik qurylymdardy tabiǵi túrde meńgerýine kómektesedi. Bul oidy naqty ári saýatty jetkizýge áser etýi múmkin.
2. Oilaý qabiletińizdi damytady. Ásirese ǵylymi, tarihi, filosofiialyq jáne kórkem ádebiet sebep-saldardy túsinýge, salystyrýǵa, taldaýǵa úiretedi.
3. Zeiin men shydamdylyqty jattyqtyrady. Uzaq mátindi oqý qysqa ári jyldam kontentke qaraǵanda nazardy bir nársege uzaq ýaqyt shoǵyrlandyrýdy talap etedi.
4. Qiial men shyǵarmashylyqtyń damýyna yqpal etedi. Kórkem shyǵarmadaǵy keiipkerlerdi, oqiǵalardy jáne álemdi adamnyń ózi elestetedi.
5. Basqa adamdardy túsinýge kómektesedi. Ádebi shyǵarmalar ártúrli adamnyń sezimin, ómir jaǵdaiyn jáne kózqarasyn túsinýge múmkindik beredi.
6. Bilimdi tereńdetedi. Kitap belgili bir taqyrypty áleýmettik jelidegi qysqa aqparatqa qaraǵanda júieli túrde túsindire alady.
7. Aqparatty syni qabyldaýǵa kómektesýi múmkin. Birneshe avtordyń pikirin oqyǵan adam bir máseleniń ártúrli túsindirmelerin salystyrýǵa daǵdylanady.
Al kerisinshe múlde kitap oqymaý Erjan Jaýbaidyń pikirinshe mindetti túrde ziian deý durys emes. Adam kitap oqymai da kóp nárse úirene alady.
«Degenmen, eger adam jalpy uzaq mátinderdi, tereń aqparatty jáne júieli bilimdi tutynýdan qashsa, belgili bir táýekelder paida bolýy múmkin», - dep topshylaidy ol.
Mysaly:
1. Sózdik qory men jazbasha tiliniń damýy baiaýyraq bolýy;
2. Kúrdeli mátindi uzaq ýaqyt oqýǵa jáne nazar aýdarýǵa qinalýy;
3. Belgili bir taqyryp boiynsha shekteýli bilim;
4. Bir ǵana derekkózdiń pikirine táýeldi bolýy;
5. Kúrdeli ideialardy uzaq ári júieli taldaýǵa qabiletsizdik.
Biraq bul qasietterdiń barlyǵy kitap oqityndarda mindetti túrde bolady, oqymaityndarda bolmaidy degen sóz emes ekenin de jýrnalist aityp ótti.
Al kitap oqityndar men oqymaityndardyń eń mańyzdy aiyrmashylyǵy mynada dep esepteidi E. Jaýbai:
«Kitaptyń ózi emes, adamnyń qandai aqparatty jáne qalai tutynatyny mańyzdy. Mysaly, kúnine birneshe saǵat sapasyz kontent kórip, eshteńeni tereń zerttemeitin adam kitapty qolyna alǵanymen kóp paida tappaýy múmkin. Al kitapty az oqysa da, ǵylymi maqalalar, dárister, sapaly kýrstar arqyly únemi bilimin tolyqtyratyn adam intellektýaldyq turǵydan jaqsy damýy múmkin.
Sondyqtan kitap oqýdyń eń úlken artyqshylyǵy — adamǵa daiyn aqparat berýde ǵana emes, uzaq ýaqyt boiy oilanýǵa, elestetýge, salystyrýǵa jáne bir máseleni tereń túsinýge múmkindik berýinde. Al kitap oqymaýdyń yqtimal ziiany — kitaptyń ózin oqymaý emes, tereń ári sapaly aqparatpen jumys isteý ádetiniń qalyptaspaýynda.
Sońynda aitarym, qandai kitap oqyǵyńyz kelse de, talǵammen oqýdy úirenińiz. Sebebi talǵammen oqyǵan kitap sizge áýeli paida ákelse, ekinshi stresten qutqarady», - dep topshylaidy ol óz jazbasynda.
