Batys Qazaqstan oblysynda sońǵy kezde sharýalar tarapynan kiikter kóbeiip, olar mal jaiylatyn jerlerdi taptap ketti degen pikir aitylyp jatqany belgili.
Osyǵan bailanysty Qazaqstandyq bioalýantúrlilikti saqtaý qaýymdastyǵynyń (QBSA) qoldanbaly biologiia ortalyǵynyń direktory Sergei Skliarenko óz oi-tolǵamyn bildirdi, dep habarlaidy QazAqparat.
Sergei Lvovichtiń sózine qaraǵanda, Batys Qazaqstanda kiik sanynyń óskeni ras.
«Biraq kiikterdiń malmen ózara aralasýy týraly naqty derekter joq. Sondyqtan bul jerde qandai da bir ótemaqy jóninde másele qozǵaýǵa erte. Óitkeni kiikterdiń sany kóbeigen kezde olardyń jaiylymdarǵa tigizgen áseri týraly zertteýler áli joq», dedi S.Skliarenko.
Onyń aitýynsha, qazir ǵalymdar arnaiy ǵylymi zertteýlersiz kiikterdiń Oral popýliatsiiasy sanynyń ósýine bailanysty jaǵdai boiynsha naqty eshteńe aita almaidy, sebebi obektivti derekter joq. Qazirgi tańda kiik sanaǵy júrgizilýde, olardyń naqty sany jónindegi dál derekter mamyr aiynyń sońyna qarai belgili bolady.
«Biyl Batys Qazaqstanda ázirge qýańshylyq baiqalmaidy. Degenmen sońǵy jyldary bul aimaqta mal jaiý júiesi ózgerdi. Mysaly, Keńes zamanynda malshylar jaiylymdardy aýystyryp otyratyn, qazir bul júie buzylǵan. Jaiylymdar tiimsiz paidalanylýda. Mal bir jerde shoǵyrlanǵandyqtan, jer de tez azady. Qalypty jaiylym ainalymy bolmaǵan soń mal azyǵynyń tapshylyǵy da baiqalady, ásirese, qýańshylyq jyldary. Bul máseleniń mánisine tolyq jetý úshin arnaiy ǵylymi zertteý júrgizý kerek», - deidi ǵalym.
«Kiikterdiń kóbeiýi ǵana emes, mal jaiylymy júiesiniń buzylýy da jerge áser etedi. Iaǵni sebep birneshe. Sondyqtan qandai da bolsyn sheshimder nemese usynymdar naqty júrgizilgen zertteýler negizinde qabyldanýy tiis. Mundai zertteýdi, mysaly, aldaǵy jaz ailarynda júrgizýge bolady. Qazirgi tańda, meniń bilýimshe, «Ohotzooprom» mekemesi kiikterdiń popýliatsiiasyn basqarý baǵytynda is-sharalardy josparlaýda, túrli tásilder qarastyrylýda», dep qorytyndylady Sergei Skliarenko.
