«Barys» búgin Qurlyqtyq hokkei ligasyndaǵy kezekti oiynyn elordada Reseidiń «Avangard» (Omby) komandasymen ótkizdi, dep habarlaidy QazAqparat.
Eki komanda biylǵy týrnirdi sátsiz ótkizip júr. Qazir týrnir kestesinde qatarlas keledi. «Barys» 13 oiynnan keiin 10 upaimen týrnir kestesinde 20-orynda tur. Al «Avangard» 12 upaimen 17-orynǵa jaiǵasqan.
Kezdesý tartysty ótti deýge negiz bar. Dese de komandalar alǵashqy eki kezeńde bir-biriniń qaqpasynan sańylaý taba alǵan joq.
Úshinshi kezeńde de oiyn barysy solai órbip jatty. Oiynnyńi bitýine bes minýt qalǵansha tablodaǵy esep ózgerissiz turdy. Qazaqstandyq hokkeishi Nikita Mihailis 54-minýtta kózdegen nysanadan múlt ketken joq.
Kezdesýde «Barys» qarsylasynan 1:0 esebimen basym tústi.
Eske salsaq, budan buryn «Barys» Reseide «Lokomotivke» jol berdi.
Aita keterligi, biylǵy kezeńdegi 13 oiynnyń nebári 4-de jeńiske jetken edi.
Endi «Barys» 8 qazanda elordada Reseidiń SKA (Sankt-Peterbýrg) komandasyn qabyldaidy.
