Halyqaralyq olimpiada komiteti (HOK) Aleksandr Lýkashenko jetekshilik etetin Belarýs ulttyq olimpiada komitetiniń basshylyǵyn olimpiada oiyndaryna qatysy bar barlyq sharalardan shettetti. Buǵan qosa, Belarýs ulttyq olimpiada komitetin qarjylandyrýdy da toqtatty. HOK sheshiminde Belarýs biligine ýaqytsha tyiym salynǵany, jaǵdaidyń órbýine qarai sheshimniń de ózgerýi múmkin ekeni jazylǵan.
Osyǵan deiin HOK sportshylardy saiasi sebeppen qýdalady dep kúdikke ilingen Belarýs biliginiń áreketin zerttei bastaǵan edi.
Tamyz aiynda 1,5 myń belarýs sportshysy prezident sailaýyn qaita ótkizýdi talap etip, belarýs biligine hat jazǵan. Hat avtorlary Lýkashenko rejimine qarsy shyqqan demonstranttardy qýǵyndaýdy da aiyptaǵan. Osydan keiin sportshylardyń keibiri ustalyp, sottalǵan. Olardyń arasynda fristail boiynsha álem chempiony atanǵan Aleksandra Romanovskaia, gimnast Svetlana Kýdelich, kúresshi Andrei Kravchenko, basketbolshy Elena Levchenko bar.
Minsk men Belarýstiń ózge qalalarynda 9 tamyzdan beri narazylyq aktsiialary ótip keledi. Ortalyq sailaý komissiiasy Lýkashenkony sailaýdyń jeńimpazy dep ataǵannan keiin turǵyndar kóshege shyǵyp, prezident sailaýynyń nátijesin joiýdy talap etken. Buǵan qosa, demonstranttarǵa kúsh qoldanýǵa da qarsy shyqqan. Batys elderi Lýkashenkonyń jeńisin moiyndamaidy. Eýroodaq Belarýs sheneýnikterine sanktsiia salǵan.
Narazylyqty kúshpen basý kezinde keminde 5 adam qaza bolǵan, 6 adam iz-túzsiz joǵalǵan. Quqyq qorǵaýshylardyń aitýynsha, shamamen 30 myń adam qýdalanyp, qoqan-loqyǵa ushyraǵan.
Resei Belarýstegi sailaý nátijesin moiyndap, jaǵdai ýshyqsa Lýkashenkoǵa áskeri kómek berýge ýáde bergen.
