حالىقارالىق وليمپيادا كوميتەتٸ (حوك) الەكساندر لۋكاشەنكو جەتەكشٸلٸك ەتەتٸن بەلارۋس ۇلتتىق وليمپيادا كوميتەتٸنٸڭ باسشىلىعىن وليمپيادا ويىندارىنا قاتىسى بار بارلىق شارالاردان شەتتەتتٸ. بۇعان قوسا, بەلارۋس ۇلتتىق وليمپيادا كوميتەتٸن قارجىلاندىرۋدى دا توقتاتتى. حوك شەشٸمٸندە بەلارۋس بيلٸگٸنە ۋاقىتشا تىيىم سالىنعانى, جاعدايدىڭ ٶربۋٸنە قاراي شەشٸمنٸڭ دە ٶزگەرۋٸ مٷمكٸن ەكەنٸ جازىلعان.
وسىعان دەيٸن حوك سپورتشىلاردى ساياسي سەبەپپەن قۋدالادى دەپ كٷدٸككە ٸلٸنگەن بەلارۋس بيلٸگٸنٸڭ ەرەكەتٸن زەرتتەي باستاعان ەدٸ.
تامىز ايىندا 1,5 مىڭ بەلارۋس سپورتشىسى پرەزيدەنت سايلاۋىن قايتا ٶتكٸزۋدٸ تالاپ ەتٸپ, بەلارۋس بيلٸگٸنە حات جازعان. حات اۆتورلارى لۋكاشەنكو رەجيمٸنە قارسى شىققان دەمونسترانتتاردى قۋعىنداۋدى دا ايىپتاعان. وسىدان كەيٸن سپورتشىلاردىڭ كەيبٸرٸ ۇستالىپ, سوتتالعان. ولاردىڭ اراسىندا فريستايل بويىنشا ەلەم چەمپيونى اتانعان الەكساندرا رومانوۆسكايا, گيمناست سۆەتلانا كۋدەليچ, كٷرەسشٸ اندرەي كراۆچەنكو, باسكەتبولشى ەلەنا لەۆچەنكو بار.
مينسك مەن بەلارۋستٸڭ ٶزگە قالالارىندا 9 تامىزدان بەرٸ نارازىلىق اكتسييالارى ٶتٸپ كەلەدٸ. ورتالىق سايلاۋ كوميسسيياسى لۋكاشەنكونى سايلاۋدىڭ جەڭٸمپازى دەپ اتاعاننان كەيٸن تۇرعىندار كٶشەگە شىعىپ, پرەزيدەنت سايلاۋىنىڭ نەتيجەسٸن جويۋدى تالاپ ەتكەن. بۇعان قوسا, دەمونسترانتتارعا كٷش قولدانۋعا دا قارسى شىققان. باتىس ەلدەرٸ لۋكاشەنكونىڭ جەڭٸسٸن مويىندامايدى. ەۋرووداق بەلارۋس شەنەۋنٸكتەرٸنە سانكتسييا سالعان.
نارازىلىقتى كٷشپەن باسۋ كەزٸندە كەمٸندە 5 ادام قازا بولعان, 6 ادام ٸز-تٷزسٸز جوعالعان. قۇقىق قورعاۋشىلاردىڭ ايتۋىنشا, شامامەن 30 مىڭ ادام قۋدالانىپ, قوقان-لوقىعا ۇشىراعان.
رەسەي بەلارۋستەگٸ سايلاۋ نەتيجەسٸن مويىنداپ, جاعداي ۋشىقسا لۋكاشەنكوعا ەسكەري كٶمەك بەرۋگە ۋەدە بەرگەن.
