OQYRMAN
…jaqsylyǵyn jetkizedi
Qart oqyrmandarǵa qamqorlyq
Jaqynda N.Baiǵanin atyndaǵy Aqtóbe oblystyq balalar kitaphanasynyń shyǵarmashylyq ujymy qaladaǵy qarttar úiine at basyn burdyq. Ondaǵy maqsat – qariialarǵa rýhani kómek kórsetý bolatyn.
Osynda kitaphanashy bolyp qyzmet atqaratyn Janat Bekentaevanyń ótinishine orai bizdiń kitaphanashylar ádistemelik kómekter kórsetip, maman retinde is-tájiribelerimen, aqyl-keńesterimen bólisti. Kitaptardy nómirleý, tizimge engizý, oqyrman formýliaryn jasaqtaý sekildi jumystardy kórsetti. Sonymen qatar ártúrli janrdaǵy kitaptar men gazet-jýrnaldardy syiǵa tartty.
– Bizdiń internatta 270-ten astam qart kisi bar. Solardyń júz jetpiske jýyǵy kitaphananyń turaqty oqyrmany. Olar kitaphanaǵa kelip, óz qajetterin osy jerden izdeidi. Alaida keide olardyń ótinishterin taýyp bere almai jatamyn, sebebi bizge kitaphana úshin memleketten qarjy bólinbeidi, myna kitaptardyń bári syiǵa berilgen kitaptar ǵana, – dedi Janat Beksultanqyzy.
Oblystyq balalar kitaphanasynyń direktory Gúljainar Qaldina ár bólmege kirip, qarttarǵa syi-siiapattaryn usyndy. Bul qarttar úiinde qariialyq jasqa jetpese de múmkindigi shekteýli jandar da bar eken. Az da bolsa kórsetilgen syi-qurmetke olar balasha qýandy.
Kamila IDRISOVA,
N.Baiǵanin atyndaǵy kitaphananyń mamany
AQTÓBE
…qýanyshyn bólisedi
76 týyndyny tartý etti
Atyraý oblystyq Sh.Sariev atyndaǵy kórkemsýret jáne qoldanbaly-sándik óner mýzeiinde Táýelsizdigimizdiń 25 jyldyǵyna orai, Á.Qasteev atyndaǵy Memlekettik óner mýzeii tartý etken týyndylardan jasaqtalǵan «Mýzeiler yntymaqtastyǵy» atty kórme ótti. Búginde jyl basynan beri júrgizilgen kelissózder nátijesinde Á.Qasteev atyndaǵy Memlekettik óner mýzeii Atyraý oblystyq óner mýzeiine 76 týyndysyn tartý etip otyr. Kún ótken saiyn qundylyǵy artqan bul eńbekterinde qylqalam sheberleri adamzat balasy úshin mańyzdylyǵyn joimaityn ózekti taqyryptardy arqaý etken. Mýzei qoryna tartý etilgen týyndylardyń deni belgili sýretshi Sahi Romanovtiki.
Kórmeni tanystyrý sátinde qylqalam sheberleri týyndylarynyń dúniege kelýine sebepshi bolǵan Semei poligony, Ekinshi dúniejúzilik soǵys pen týǵan jer týraly beinekórsetilim kópshilik nazaryna usynyldy. Bunyń ózi mýzeiler yntymaqtastyǵyn maqsat etken ujymdardyń utymdy jobany qolǵa alǵanyn aiqyndap bergendei edi.
Tursyn QALIMOVA
ATYRAÝ
…pikir bildiredi
Ǵibratty ǵumyrbaian
Jaqynda Astana qalasyndaǵy «Shańyraq Media» JShS baspasynan belgili jýrnalist Sádýaqas Jubatovtyń «Asyldyń tuiaǵy» atty kitaby jaryq kórdi. Bul kitapta eline abyroily qyzmet etken ulaǵatty ustaz Qaiyrǵali Ishanuly Maqulovtyń órnekti ómiri sóz bolady.
«Jaqsynyń jaqsylyǵyn ait, nury tasysyn» deitin halyq danalyǵy osyndaida aitylatyn bolar. Árbir qalam ustaǵan jornalshy ózi kórgen, estip-bilgen, ómirinde ónegelik iz qaldyrǵan jan týraly áńgime qozǵap jatsa, bir mindetin oryndaǵany da. Meniń de Qaiyrǵali aǵanyń qarapaiym, biraq maǵynaly ómiri jaily sóz arnaǵym kelgeni osyndai maqsattan týǵan edi», dep bastalatyn kitap bes bólimnen turady. «Er topyraǵyna tartady» atalatyn birinshi bóliminde keiipkerdiń týǵan jeri týraly sóz bolsa, «Maquldyń Ishany» atalatyn ekinshi bóliminde batys óńirindegi Naryn qumynda ómir súrgen Qaiyrǵalidyń ákesi Ishanǵali jaily, onyń artynda qaldyrǵan tapqyr áńgimeleri, ádildik úshin, shyndyq úshin qara qyldy qaq jaratyn azamattyǵy týraly aitylady. «Ólmeituǵyn artynda sóz qaldyrǵan», «Biz biletin Qairekeń», «Áýletiń ósse el bolar» dep atalatyn bólimderge attarynyń ózi aityp turǵandai, keiipkerdi kózi kórgenderdiń, áýlet urpaqtarynyń estelik áńgimeleri arqaý bolǵan.
Qaida júrse de týǵan jerge degen saǵynysh sezimin joǵaltpaǵan aq júrekti asyl jan týraly áserli shyǵarmaǵa qýandyq. Ǵibraty mol ǵumyrbaiandyq kitapty jas urpaqqa taǵylym bolar týyndy dep esepteimiz.
Baian MUHAMBETÁLIEV,
Mádeniet qairatkeri
ASTANA
…maqtan tutady
Dertke – shipa, janǵa – qýat
Saryarqanyń tósinde sary qymyz sapyryp, babadan kele jatqan ata kásipti jandandyrǵan «Saǵyp» sharýa qojalyǵyn óńir turǵyndary ǵana emes, kórshiles elderdiń tutynýshylary da jaqsy biledi. Dertke – shipa, janǵa – qýat ulttyq sýsyn – qymyz óndirisin órkendetý jolynda ter tógip júrgen sharýashylyqtyń tasy bul kúnde órge domalap tur. Sharýashylyqtaǵy Qambar ata tuqymynyń sany 400-den asqan. Budan bólek, júzden asa iri qara bar.
Búgingi kúni «Saǵyptyń» ónimderi shekaranyń arǵy jaǵyndaǵy tutynýshylardyń da joǵary baǵasyn alyp úlgerdi. Pavlodarlyq kásiporynnyń qymyzy men qurty Resei jáne Qytai memleketterindegi saýda oryndarynda satylymǵa shyǵaryldy. Osy ýaqytqa deiin sharýashylyq Astana qalasynda ótken «Qaraótkel» kórmesiniń altyn medal iegeri, Iakýtiiadaǵy «Qymyz qudailar sýsyny» halyqaralyq baiqaýynyń jeńimpazy atanyp, 2013 jyly «Qazaqstannyń eń úzdik taýary» baiqaýynda úshinshi oryndy enshilegen. Osylaisha, zamanaýi quraldar kómegimen álemdik talaptarǵa sai qymyz óndiretin «Saǵyp» sharýa qojalyǵy biik shyńdardy baǵyndyryp keledi.
Qundyz QABYLDENOVA
Pavlodar oblysy
…alǵys aitady
Kishkentai juldyzdar qýanyshy
Ertis jaǵalaýynda «Aqshyń» korporatsiiasynyń demeýshilik kórsetýimen semeilik búldirshinder zor qýanyshqa keneldi. Naqty aitqanda, 322 balaqan merekelik kontsert kórip, ózderi de ónerlerin ortaǵa saldy. Olardyń barlyǵy da qalamyzdaǵy án-bi stýdiialarynan ónerlerin shyńdap, halyqaralyq, respýblikalyq óner saiystarynan júldemen oralyp júrgen jas talanttar. «Tek qana juldyzdar» degen atpen merekelik kontsert ótkizýdegi maqsat – Semeide halyqaralyq, respýblikalyq deńgeidegi óner baiqaýlaryna baryp, Gran-pri jáne júldeli oryndarmen oralyp júrgen talantty balalardy qala jurtshylyǵyna keńinen tanytý. Sharanyń oidaǵydai ótýine úlken qoldaý kórsetip, arnaiy bezendirilgen sahna jasatyp, 300-den astam balaǵa merekelik kóńil kúi syilaǵan «Aqshyń» korporatsiiasynyń basshysy, Shyǵys Qazaqstan oblystyq máslihatynyń depýtaty Qurmanbai Marat Serikjanulyna osynda kelgen ata-analar men balalardyń atynan zor alǵysymyzdy aitamyz.
Sátjan QASYMJANULY
Shyǵys Qazaqstan oblysy
.jpeg)