Senattyń jalpy otyrysynda depýtat Muhtar Jumaǵaziev «Aýyl – el besigi» jobasynyń júzege asyrylý barysyndaǵy kemshilikterdi atady. Onyń paiymynsha, halyqtyń qalaǵa aǵylýyn toqtatý úshin de aýyldy kórkeitý kerek, dep habarlaidy "Ult aqparat".
«Agrarlyq sektordy damytýǵa keiingi bes jylda 1,2 trln teńge bólinip, 2014 jylmen salystyrǵanda 2,2 ese ósken. Osy jyldary sýbsidiia kólemi de 152 mlrd teńgeden 324 mlrd teńgege, óndirilgen ónim kólemi 1,7 ese ósti. Árine keiingi jyldary shyǵyndardy ákimshilendirýdi jetildirýde birshama jumys atqarylǵanymen memlekettik resýrsty tiimdi paidalanýda kemshilikter saqtalýda. Máselen jergilikti organdardyń sapasyz josparynyń saldarynan 2019 jyl men aldyńǵy jyldary qordalanǵan sharýalarǵa tiesili 37 mlrd teńgege jýyq mal sharýashylyǵyna arnalǵan sýbsidiia qaryzdary paida bolǵan. Osyǵan bailanysty Parlament depýtattarynyń aralasýymen aýyl sharýashylyǵy taýaryn óndirýshilerdiń qaryzy tolyǵymen óteldi», - dedi Muhtar Jumaǵaziev Parlament Senatynyń otyrysynda.
Senatordyń aitýyna qaraǵanda «Aýyl el – besigi» jobasynyń maqsaty - aýyldyń infraqurylymyn damytý, eldi mekendegi sý men jol, densaýlyq saqtaý men bilim berý salalaryna qatysty problemalardy sheshý, aýyldyń áleýetin arttyrý.
«2019 jyly 30 mlrd teńgege 53 aýyldyń infraqurylymy jóndele bastady. Bul mańyzdy joba. Sebebi elimizdiń bai agrarlyq áleýetin paidalana otyryp, halqymyzdy organikalyq ónimdermen qamtamasyz etý – tek aýyl turǵyndarynyń qolynan keledi. Tótenshe jaǵdaidyń ózinde kóktemgi egis jumystaryn atqaryp shyqqany osyǵan dálel. Jalǵan ýrbanizatsiiaǵa erip, aýyl adamdaryna qalaǵa kóshý protsesterin toqtatý úshin bul jobanyń sapaly iske asýy mańyzdy dep esepteimin», - dedi ol.
Muhtar Jumaǵaziev atalmysh jobany júzege asyrý barysynda áli de salǵyrttyq, biýrokratizm basym ekenin jetkizdi.
«Birinshiden «Aýyl el – besigi» jobasynda barlyq qajetti sala qamtylmaǵan. Jumystar naqtylanbaǵan. Arnaiy joba dep atalǵanymen bir arnaǵa baǵyttalǵan, bir maqsatqa túiistirilgen joba joq. 2025 jylǵa deiingi óńirlerdi damytýdyń memlekettik baǵdarlamasynyń ishine bir bólik bolyp kirip ketken. Ekinshiden jobanyń ákimshisi retindegi Ulttyq ekonomika ministrligi biýdjetten bólingen 30 mlrd teńgege ǵana baqylaý júrgizedi. Al aýyl-aimaqtardy damytýǵa baǵyttalǵan «Nurly jol», «Nurly jer», «Jumyspen qamtýdyń jol kartasy» baǵdarlamalarynda qamtylǵan sharalarmen úilesim joq», - dedi ol.
Onyń sózinshe aýyldyń jolyn jóndep, mektebi men aýrýhanasyn rettep, sý men gaz berip, árlep-syrlaǵanymen jumys oryndary bolmasa halyqty, jastardy aýylda turaqtandyrý múmkin emes.
«Aýyl turǵyndary qalaǵa kóshýin toqtatpasa aýyldy jóndegennen ne paida? Qazagro holdinginiń aqparatyna súiensek, «Aýyl – el besigi» jobasy aiasynda iske asyrylatyn 2451 jobanyń basym kópshiligi 400 myń men 2 mln teńge aralyǵyndaǵy usaq-túiek jobalar. Al tirek aýyldardy damytýǵa múmkindik beretin, halyqty jumyspen qamtityn, jaqyn jatqan kishigirim aýyldardyń damýyn arqalai alatyn irgeli jobalardyń sany nebári 24», - dedi ol.
Senator atalmysh baǵdarlamany júzege asyrýda Úkimetten osy máselege bailanysty naqty sharalardy qabyldaýdy surady.
