Premer-Ministr Álihan Smaiylovtyń tóraǵalyǵymen ótken Úkimet otyrysynda «Tsifrlandyrý, ǵylym jáne innovatsiia esebinen tehnologiialyq serpilis» ulttyq jobasyn iske asyrý barysy qaraldy, dep habarlaidy "Ult aqparat" primeminister.kz saityna silteme jasap.
Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinniń aitýynsha, Ulttyq joba aiasynda memlekettik qyzmet kórsetýdiń 175 biznes-protsesine jańa ádisteme boiynsha reinjiniring jasalǵan. Nátijesinde jumsalatyn qaǵaz sany men qajetsiz biýrokratiia joiyldy. 2025 jylǵa deiin barlyq 5 myń biznes-protseske tolyq reinjiniring jasalatyn bolady. Memlekettik qyzmetterdi elektrondyq formatqa aýystyrý josparǵa sáikes júrgizilip jatyr, búginde olardyń úlesi 94%-ǵa jetti.
Sondai-aq 9 memlekettik qyzmet túrin Halyqqa qyzmet kórsetý ortalyqtaryna barmai-aq, beine-qyzmet arqyly alý múmkindigi iske asyryldy. Jyl sońyna deiin olardyń sany 44-ke deiin jetkizilmek. HQKO-lardy jańǵyrtý jospar boiynsha júzege asyrylýda, qazirdiń ózinde 8 jańa front-ofis halyqqa qyzmet kórsetip jatyr. 2024 jylǵa deiin 115 halyqqa qyzmet kórsetý ortalyǵy jańǵyrtylady.
«Kaznedra» biryńǵai platformasy boiynsha búginde testileý rejiminde «minerals.gov.kz» saity iske qosyldy. Qazirden bastap paidalanýshynyń jeke kabinetinde interaktivti kartaǵa basylǵan jer qoinaýy týraly 1,5 myń elektrondy esep qoljetimdi. Platforma arqyly jer qoinaýyn barlaýǵa tiisti litsenziiaǵa ótinim berý jáne ýákiletti memlekettik organmen ózara elektrondy hat almasý múmkindigi bar.
Qurylys jáne kólik salalaryn tsifrlandyrý aiasynda E-Qurylys platformasynda 92 respýblikalyq avtomobil joldarynyń qurylysyn baqylaý protsesi júzege asyrylyp jatyr.
Aýyl sharýashylyǵy salasynda 2022 jyldyń 1 shildesinen bastap Sýbsidiialaýdyń júiesi iske qosyldy. Munda fermerlerge qajetti memlekettik qoldaý jónindegi barlyq aqparat jinalǵan, bul fermerlerge shyǵyndardy 30%-ǵa qysqartýǵa, jalpy qujattarmen áýre-sarsańdy qysqartýǵa múmkindik beredi.
Otyn-energetika kesheni salasynda barlyq AJQS qosylǵan munai jáne gaz kondensatyn esepke alýdyń aqparattyq júiesi paidalanýǵa engizildi. Endi jańarmai jáne ózge shikizattyń satylýy men qory týraly aqparat onlain túrde qoljetimdi bolady.
Bilim berýdi tsifrlandyrý boiynsha mańyzdy jobalardyń biri – oqýlyqtar portfelin tsifrlyq formatqa kóshirý. Búginde qolda bar 670 baspa oqýlyǵynyń 97% tsifrlyq formatqa kóshirildi. Jyl sońyna deiin 100% tsifrlandyrylady.
Ǵylym jáne joǵary bilim ministri Saiasat Nurbek Ulttyq joba aiasynda ǵylymi ekojúieniń básekege qabilettiligin arttyrý boiynsha júrgizilip jatqan jumystar týraly aityp berdi.
Baiandamashylardy tyńdaǵan Premer-Ministr Ulttyq jobany iske asyrý IT-saladaǵy Jalpy ishki ónimniń úlesin 5%-ǵa deiin ulǵaityp, qoldanbaly ǵylymi zertteýlerdi qarjylandyrýda jeke sektordyń úlesin keminde 50%-ǵa arttyrýy tiis ekenin aitty. Sonymen qatar onyń aiasynda azamattarǵa áleýmettik qoldaý alýdy jeńildetýge múmkindik beretin jobalar pýly iske asyrylyp jatyr.
«Jaqynda pilottyq negizde iske qosylǵan «Otbasynyń tsifrlyq kartasy» jobasy osy tásilderdiń biri bolyp tabylady. Bul joba ataýly áleýmettik kómek alýǵa muqtajdyq týýy múmkin 480 myńnan astam otbasyn jáne zeinetaqy tólemderi men járdemaqy alyp otyrǵan 100 myńǵa jýyq azamatty qamtýǵa múmkindik berdi. Jobany biylǵy jyldyń sońyna deiin paidalanýǵa berý josparlanyp otyr», — dedi Álihan Smaiylov.
Onyń aitýynsha, «Áleýmettik ámiian» júiesin iske qosý jáne investorlarǵa naqty ýaqyt rejiminde mineraldyq resýrstardyń derekter bankine erkin qol jetkizýge múmkindik beretin «Kaznedra» platformasyn engizý josparlanyp otyr.
Premer-Ministr Úkimet aldynda ǵylymi zertteýlerdiń nátijeliligi men ekonomikanyń túrli sektorlarynda qoldanylýyn arttyrý siiaqty mańyzdy mindet turǵanyn atap ótti.
Osy oraida Álihan Smaiylov sońǵy jyldary ǵylym týraly zańnamaǵa birshama ózgerister engizilgenin jáne ony qarjylandyrý 2 esege jýyq óskenin aitty.
«Bizge jumsalǵan qarajattyń tiimdi qaitarymy qajet. Otandyq indýstriia, ǵylymi qoǵamdastyq, ýniversitetter men biznes barynsha ózara tyǵyz bailanys ornatýy qajet. Ǵylymi jetistikter óndiriske engizilip, halyqqa naqty paida ákelýi tiis. Ǵylym ministrligi buǵan erekshe nazar aýdarýy kerek», — dedi Álihan Smaiylov.
Bul rette Premer-Ministr birqatar baǵyttar boiynsha buryn belgilengen josparlar men keibir kórsetkishterdiń oryndalmai qalǵanyn atap ótti. Patsientterdiń densaýlyq jaǵdaiyn úzdiksiz baqylaý jáne proaktivti meditsinalyq qyzmet kórsetý úshin eHealth biryńǵai ekojúiesin ázirleý jumystary ýaqytyly júrgizilgen joq. Sonymen qatar «Tsifrlyq agrokásiporyn» jáne «Tsifrlyq karer» jobalaryn iske asyrý barysynda da suraqtar bar. Jer men jyljymaityn múliktiń memlekettik kadastryn avtomattandyrý jáne ortalyqtandyrý rásimi aiaqtalǵan joq.
«Jalpy, internet-qyzmetterdiń sapasyna suraqtar bar. Alystaǵy eldi mekenderdi aitpaǵanda, bizdiń iri qalalarymyzda Internet bailanystyń sapasy barlyq jerde birdei jaqsy emes. Halyqtan túsip jatqan shaǵym kóp. Eger Internet bailanys jaqsy bolmasa tsifrlyq platformalardyń jáne aqparattyq júielerdiń paidasy joq. Tsifrlyq damý ministrligi bul máseleni erekshe baqylaýda ustaý kerek», — dedi Álihan Smaiylov.
Sondai-aq ol tsifrlandyrý salasyndaǵy barlyq múddeli memlekettik organdardyń jáne uiymdardyń jumysyn úilestirýdi kúsheitý qajet ekenin aitty.
Sóz sońynda Álihan Smaiylov aqparattyq júielerdiń isten shyǵýyn azaitatyn júieli sharalar qabyldaýdy, jyl sońyna deiin «Otbasynyń tsifrlyq kartasy» jáne «Áleýmettik ámiian» jobalarynyń tiimdi jumysyn qamtamasyz etýdi, sondai-aq 2023 jyldyń sońyna deiin «Kaznedra» platformasyn iske qosýdy tapsyrdy.
Sonymen qatar Premer-Ministr eldiń ǵylymi-tehnikalyq damýyna jeke investitsiialardy keńinen tartý úshin jańa ǵylymi-zertteý ortalyqtary men zerthanalar qurýdy basym investitsiialyq jobalar tizbesine engizý máselelerin pysyqtaýdy tapsyrdy.
