Jer reformasy jónindegi komissiia Úkimetke orman alqaptarynan jaiylymdar men shabyndyqtardy jalǵa berý bóligindegi zańnamany jetildirýdi usyndy, dep habarlaidy QazAqparat.
QR Premer-Ministriniń orynbasary Eraly Toǵjanovtyń tóraǵalyǵymen ótip jatqan Jer reformasy jónindegi komissiianyń úshinshi otyrysynda ekonomikalyq máseleler jónindegi jumys tobynyń basshysy Aqylbek Kúrishbaev osyndai usynys aitty.
«Orman qory jerlerindegi orman sharýashylyǵy úshin paidalanylmaityn aýylsharýashylyq alqaptaryn aýyl sharýashylyǵy maqsatyndaǵy jerler sanatyna aýystyrý jáne jergilikti halyqtyń mal jaiýy úshin sol jerlerdi jalǵa berý múmkindigin keńeitý qajet. Orman qory jerlerin azaitýǵa top músheleri qarsy boldy. Óitkeni Qazaqstandaǵy orman alqabynyń úlesi bes-aq paiyz. Kerisinshe, biz ormandarymyzdy saqtap, onyń kólemin ulǵaitýymyz qajet», - dedi komissiia múshesi.
Onyń aitýynsha, jumys tobynyń otyrystary kezinde sarapshylar orman qoryndaǵy jaiylymdardy jergilikti halyqtyń mal jaiý úshin tiimdi paidalanýyna kóp kedergi bar ekenine kóz jetkizgen.
«Mysaly, Qazaqstandaǵy orman qorlarynyń jáne erekshe qorǵalatyn aýmaqtardyń alqaptary 41 mln gektarǵa jýyq. Sonyń ishinde 10 mln gektardai arnaiy jaiylymǵa berilgen jerler. Bul – úlken múmkindik. Biraq, ókinishke qarai, jaiylymdardy jergilikti halyqqa jalǵa berý máselelerinde biýrokratiia óte kóp. Memlekettik organdar jáne jergilikti ákimshilik tarapynan bul máseleler tiisti deńgeide baqylanbaidy. Bizdiń usynysymyz – halyqtyń jaiylymdyq jerlerdegi qajettilikterin qanaǵattandyrý úshin Qazaqstan Respýblikasynyń Úkimetine orman alqaptarynan jaiylymdar men shabyndyqtardy jalǵa berý bóligindegi zańnamany jetildirý. Jumys tobyndaǵy kópshilik osy máseleni qoldady», – dedi Kúrishbaev.
