Parlament Senatynyń jalpy otyrysynda «Qazaqstan Respýblikasy men Halyqaralyq qarjy korporatsiiasy arasyndaǵy Qazaqstanda ofister qurý jáne olardyń qyzmeti týraly kelisimdi ratifikatsiialaý týraly» Zańy qabyldandy, dep habarlaidy QazAqparat.
Kelisim 2020 jyly 28 qańtarda Nur-Sultan qalasynda jasaldy.
«Kelisim Halyqaralyq qarjy korporatsiiasynyń ofisi qyzmetiniń negizgi erejelerin, sondai-aq, qyzmetkerler úshin artyqshylyqtar men immýnitetterdi belgileidi. Halyqaralyq qarjy korporatsiiasy 1956 jyly qurylyp, halyqaralyq damý institýty sanalady. Onyń negizgi qyzmeti jeke sektordyń damýyna járdemdesýge baǵyttalǵan. Halyqaralyq Qarjy Korporatsiiasy Dúniejúzilik bank tobynyń quramyna kiredi», - dedi Qazaqstan Respýblikasynyń Ulttyq ekonomika ministri Áset Erǵaliev.
Halyqaralyq qarjy korporatsiiasynyń keńseleri 104 elde bar.
Sonymen birge, korporatsiia óńirlik ofisteri álemniń tek 13 qalasynda, onyń ishinde Almatyda ornalasqan.
«Halyqaralyq qarjy korporatsiiasy ofisteri ornalasqan barlyq memlekettermen ofisterdiń qyzmeti týraly uqsas kelisimder jasady. Ol Qazaqstanda óz qyzmetin 1994 jyldan bastap júzege asyryp keledi.
Osy kezeńnen bastap 1,6 milliard dollar kóleminde jobalar qarjylandyryldy. Bul Ortalyq Aziia elderine salynǵan investitsiialardyń jalpy kóleminiń 70 paiyzyn qurady. Atalǵan kelisim Halyqaralyq qarjy korporatsiiasynyń qazaqstandyq ofisiniń ornyqty jumys isteýine jáne jańa investitsiialar tartýǵa yqpal etedi. Kelisimdi ratifikatsiialaý teris áleýmettik-ekonomikalyq jáne quqyqtyq saldarǵa ákep soqpaidy», - dedi ministr.
