Foto: Aikyn.kz
2026 jyldyń 21-23 mamyr aralyǵynda Qazaqstan Respýblikasy Mádeniet jáne aqparat ministrligi «Qazaqstan Halyq banki» aktsionerlik qoǵamynyń demeýshiligimen «HALYQ ÁÝENI» aýqymdy biregei jobasyn júzege asyrady, dep habarlaidy Ult.kz.
«Mádeniet – ulttyń tólqujaty. Jahan jurty elimizdi eń aldymen ónerimiz arqyly tanyp biledi. Biz – Uly dalada tamyr jaiǵan biregei mádeniettiń zańdy muragerimiz. Qazaq jerinen shyqqan qaitalanbas óner ieleriniń teńdessiz týyndylary tutas ultty tárbieledi. Qazir tól mádenietimiz dúnie júzine tanylyp jatyr», - dep Memleket basshysy Qasym-Jomart Toqaev atap ótkendei, joba Prezidentimiz kótergen mádeni saiasattyń basym baǵyttarymen úndes. Atap aitqanda, mádeniet pen ónerdi tek iri qalalarda ǵana emes, óńirler men aýyldyq aimaqtarda damytý, halyqtyń mádeni igilikterge teń qoljetimdiligin qamtamasyz etý, sondai-aq shyǵarmashylyq ujymdardyń el aýmaǵynda keńinen taralýyn arttyrý mindetteri jobanyń negizgi mazmunyn aiqyndaidy.
«HALYQ ÁÝENI» – ulttyq rýhaniiatty jańǵyrtýǵa baǵyttalǵan, halyqtyq mýzykalyq murany zamanaýi formatta usynatyn erekshe mádeni bastama. Joba aiasynda san ǵasyrlyq saz ben dástúr sabaqtastyǵy búgingi tyńdarmanmen jańa sipatta úndesip, ulttyq ónerdiń tereń tamyryn keńinen tanytýǵa múmkindik beredi.
Jobanyń bastalýy 21 mamyrǵa iaǵni mádeniet jáne óner qyzmetkerleriniń kásibi merekesimen tuspa-tus kelip tur. Bul jait bastamanyń simvoldyq mánin arttyryp, onyń rýhani mazmunyn tereńdete túsedi.
Joba aiasynda ministrlikke qarasty jetekshi shyǵarmashylyq ujymdar elimizdiń 17 óńirinde gastroldik sapar uiymdastyrady. Kontserttik baǵdarlamalar Abai, Aqmola, Aqtóbe, Almaty, Atyraý, Batys Qazaqstan, Jetisý, Jambyl, Qaraǵandy, Mańǵystaý, Qostanai, Qyzylorda, Soltústik Qazaqstan, Ulytaý, Túrkistan, Shyǵys Qazaqstan jáne Pavlodar oblystaryn qamtidy. Sonymen qatar óner ujymdary shalǵai aýdan ortalyqtary men aýyldyq eldi mekenderge baryp, kórermenge ulttyq jáne zamanaýi ónerdiń úzdik úlgilerin usynady.
Jobanyń negizgi maqsaty – joǵary kórkemdik deńgeidegi kontserttik baǵdarlamalar arqyly Qazaqstan halqynyń mádeni qundylyqtarǵa teń qol jetkizýin qamtamasyz etý.
«HALYQ ÁÝENI» jobasyn uiymdastyrý jáne úilestirý jumystaryn Roza Baǵlanova atyndaǵy «Qazaqkontsert» memlekettik akademiialyq kontserttik uiymy júzege asyrady.
