Halqymyz endigi ne istese de «joldasy sabyr men aqyl» ǵana bolýy kerek. Bul týraly búgin «Nur Otan» partiiasynyń kezekten tys HH sezin qorytyndylaǵan QR Tuńǵysh Prezidenti - Elbasy Nursultan Nazarbaev aitty, dep habarlaidy QazAqparat.
«Prezident Qasym-Jomart Kemeluly Toqaev sailaýaldy baǵdarlamanyń negizgi baǵyttaryna toqtaldy. Biz ony tolyq júzege asyrýymyz kerek. Baǵdarlamany oryndaý arqyly qiyndyqtardy eńserip qana qoimai, halyqtyń ómir súrý sapasyn arttyryp, elimizdiń tabysty damýyn qamtamasyz etýge jol ashýymyz qajet. Keler jyly ulan-baitaq dalamyzda Táýelsiz memleket qurǵanymyzǵa 30 jyl tolady. Bul - óte qasietti kezeń. Ata-babamyzdyń qanymen, analarymyzdyń terimen kelgen. Sondyqtan qolymyzǵa túsken osy teńdesi joq altyndy alyp júrý bizdiń moinymyzǵa júktelgen paryz», - dedi Elbasy.
QR Tuńǵysh Prezidenti ótken ǵasyrda halqymyz toǵyz túrli alapatty bastan keshirgenin atap ótti. Ekinshi dúniejúzilik soǵys, 2 zulmat asharshylyq, ult-azattyq qozǵalystar, qýǵyn-súrgin jyldarynda 4 mln adam qyrshyn ketip, 1,5 mln qazaq bosqynǵa ainalyp, shet memleketterge bas saýǵalaǵanyn basa aitty.
«Bul ultymyz úshin aýyr qasiret. Qai halyq osyndai qasiretti basynan keshirgen eken. Soǵan qaramastan halqymyz ata-babamyz qaldyrǵan jerinde óziniń memleketin quryp otyr. Elordasyn eldiń ortasyna ákep ornattyq. Dúniege elimizdi pash ettik. «Taǵdyrdyń tezinen, tozaqtyń ózinen» ótip, «myń ólip myń tirilgen», Táýelsizdiktiń tátti dámin sezingen halqymyzdyń endigi ne istese de «joldasy sabyr men aqyl» ǵana bolýy kerek», - dedi Nursultan Nazarbaev.
.jpeg)