Qazaqstanda ónimder men taýarlardyń halal standartyna sai ekenin Qazaqstan Musylmandary dini basqarmasy bekitetin bolady. Bul týraly Úkimet otyrysynan keiin ótken baspasóz máslihatynda QR Investitsiialar jáne damý ministrligi Tehnikalyq retteý jáne metrologiia komitetiniń tóraǵasy Ǵalymjan Doǵalov aitty, dep habarlaidy QazAqparat tilshisi.
Komitet tóraǵasyna BAQ ókilderi tarapynan: «Halal» dep belgilengen taýarlar kóbeiip ketti. Ol standarttardy kim berip jatyr?», - degen saýal qoiyldy.
«Búgingi kúni bul jumyspen Qazaqstan Musylmandarynyń dini basqarmasy ainalysyp jatyr. Olar birqatar ónimderdiń túrin bekitti. Sonymen birge, osy standarttardy belgileitin malaiziialyq departamentpen jumys júrgizilýde. Demek, malaiziialyq tájiribe negizge alynyp otyr. Sondai-aq óz tarapymyzdan sáikesinshe seminarlar ótkizip, Aýyl sharýashylyǵy ministrligimen birlesken jobany qolǵa aldyq», - deidi komitet tóraǵasy.
Onyń aitýynsha, Qazaqstanda ulttyq akkreditteý ortalyǵy bar. Sol ortalyqta ónimderdi akkreditatsiiadan ótkizýge de bolady.
«Memleket taraby QR Din isteri jáne azamattyq qoǵam ministrligimen birge halal ónimderge memlekettik-ulttyq standarttardy engizbeý týraly sheshim qabyldady. Aityp ótkenimdei, ónimniń halal ekenin Qazaqstan Musylmandary dini basqarmasy bekitetin bolady. Qazirgi tańda Qazaqstan Musylmandary dini basqarmasynyń janynda ónimdi ajyratatyn uiym jumys isteidi», - deidi Ǵalymjan Doǵalov.
