Qazaqstan Respýblikasy Memlekettik ortalyq mýzeiiniń direktory Nursan Álimbai 1916 jylǵy ult azattyq kóterilisiniń uiymdastyrýshylarynyń biri Keiki batyrdyń bas súiegin zerthanalyq zertteýler júrgizý úshin Astanadan Almatyǵa jetkizedi. Bul týraly qoǵam qairatkeri, saiasattanýshy Berik Ábdiǵaliuly Feisbýktegi paraqshasynda jazdy, dep habarlaidy "Ult aqparat".
«Nursan (Álimbei) aǵamyz Keiki batyrdyń bas súiegin Almatyǵa alyp ketip barady. Aeroporttyń tekserýinen ótti (video). Otbasymyzben Batyr men aǵamyzdy shyǵaryp saldyq. Astanadan (saǵat) 22.30-da ushady. Almaty qarsy al!», dep jazdy saiasattanýshy.
Berik Ábdiǵaliulynyń sózine qaraǵanda, antropologter batyrdyń bet kelbetin jasap bolǵasyn, shamamen 1-2 ai kóleminde bas súiek Qostanai oblysynyń Amangeldi aýdanyndaǵy arnaiy salynǵan mazarǵa jerlenedi.
Aita keteiik, aǵymdaǵy jyly mamyr aiynda halyq aldynda esep bergen QR Mádeniet jáne sport ministri Arystanbek Muhamediuly Keiki batyrdyń bas qańqasyn qaitarý boiynsha atqarylyp jatqan jumystar jaiynda aitqan bolatyn.
«Bizdiń Serik Aqylbai (senator – avt.) osy másele boiynsha jii habarlasyp otyrady. Keiki batyrdyń basy ne boldy dep. Men ózim osy máseleni jiti baqylap kelemin. Aptasyna bir ret Resei jaqqa óz hatymdy jiberip otyramyn. Shynyn aitý kerek, otandastarymyzdyń osy jumys boiynsha bizdi belsendi áreket etýge yqpal jasap otyrǵandary qýantady. Jaqyn arada bul máseleni sheshemiz dep oilaimyn. Sebebi Resei jaqtan kelisim keldi. Oǵan qosa, Almatydaǵy Ortalyq memlekettik mýzei direktory Nursan Álimbai siiaqty ǵalymdarymyz ekspeditsiiaǵa baryp, nýmeratsiiasyn, barlyq muraǵat málimetterin tapty. Endi, tehnikalyq protsedýralar qalyp otyr. Men onyń naqty ýaqytyn aita almaimyn. Men oilaimyn, belsendi áriptestik qarym-qatynastyń arqasynda biz atalǵan artefaktini tezdetip qaitara alamyz», - deidi A.Muhamediuly.
.jpeg)