Elimizdegi keibir joǵary oqý oryndary Memleket basshysynyń oqytýshylar jalaqysyn kóterý tapsyrmasyn oryndamai otyr. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Jalaqyny 25 paiyzǵa ósirý tapsyrmasy bolǵan edi. Ýniversitetterdiń basym kópshiligi bul tapsyrmany durys deńgeide oryndady. Keibir ýniversitet tolyq oryndamaǵan. Osy ýniversitetterdiń Direktorlar keńesi tóraǵalaryna tapsyrma beremin. Aldymyzdaǵy eń birinshi Direktorlar keńesiniń otyrysynda qarap, tiisti sheshim qabyldap, bul máseleni jabý kerek. Ásirese pedagogikalyq baǵytta bilim beretin ýniversitetter. Pedagogikalyq ýniversitetterde jalaqynyń ósýi basqa ýniversittermen qaraǵanda álde qaida kóbirek bolýy tiis. Nege? Óitkeni, Prezidenttiń tapsyrmasy boiynsha osy pedagogikalyq ýniversitetterde oqý quny, biýdjetten berilip otyrǵan grantyń quny basqa ýniversitettermen salystyrǵanda kóbirek», - dedi Ashat Aimaǵambetov ministrliktiń apparat keńesinde.
Ministrdiń aitýynsha, bul óz kezeginde pedagogikalyq mamandyqtar boiynsha jalaqynyń ósýine múmkindik beredi.
«Muny da durys túsindirýimiz kerek. Jalpy pedagog mártebesi boiynsha da jalaqynyń qazirgi ýaqytta óskeni bárine belgili. Qańtar aiynan bastap 25 paiyzǵa artty. Qyrkúiek aiynda da jalaqynyń biraz ósimi oryn aldy. Kelesi jyly qańtarda da kóteriledi. Munyń barlyǵy Prezident tapsyrmasynyń aiasynda oryn alyp jatyr. Bul bilim basqarmasyna álde ministrlikke ne basqa tulǵalarǵa bailanysty másele emes. Memleket basshysy aldyńǵy jyly tamyz keńesinde bergen tapsyrmasy aiasynda biýdjetten qyraýar qarajat bólinip jatyr», - dedi ol.
