Túrkistan oblysynda Keles ózenine aǵyp ketken 8 jasar Jannurdyń taǵdyry áli kúnge deiin belgisiz. Balanyń anasynyń jan tebirenterlik hatyn jýrnalist Gúlmira Ábiqai áleýmettik jelidegi paraqshasynda jariialady, dep habarlaidy ult.kz.
Qaiǵyly oqiǵa 2026 jyldyń 23 naýryzynda bolǵan. Sol kúni bala Keles ózenine aǵyp ketip, ony izdeý jumystary bastalǵan. Alaida araǵa birneshe ai ótse de, Jannurdyń denesi tabylmaǵan.
Jaqynda balanyń anasyna ulynyń sýreti berilgen. Jannurdyń sýreti mekteptegi úzdikter taqtasyna ilingen eken. Balasynyń beinesin qolyna alǵan ana úshin bul sát aýyr tigen.
«Sýreti bar, ózi joq. Qaidan bardyń sol Keleske, balam? Nege erdiń bireýdiń balasyna? Sol kúni seni úiden nege shyǵardym eken? Keshir meni, ulym, seni qorǵai almadym. Maǵan sensiz óte aýyr. Sensiz ómir súrý óte qiyn. Saǵyndym seni, Jannurym», – dep jazǵan anasy.
Jýrnalist Gúlmira Ábiqai da bul hattyń ózine qatty áser etkenin aitty. Onyń sózinshe, balanyń joǵalǵanyna birneshe ai ótse de, otbasy áli kúnge deiin naqty jaýap kútip otyr.
«Ómirdegi eń qiyny – belgisizdik», – dep jazdy jýrnalist.
Qazir Jannurdyń qaida ekeni belgisiz. Onyń otbasy balanyń taǵdyryna qatysty qandai da bir aqparattan úmit úzbei otyr.
