Foto: Tengrinews.kz / Alihan Sariev
Almatydaǵy Qazaqstan-Britan tehnikalyq ýniversiteti (QBTÝ) stýdentteri ǵimaratta bolǵan órtke bailanysty onlain oqýǵa aýystyryldy, - dep habarlaidy Tengrinews.kz tilshisi.
"Oqiǵaǵa bailanysty oqý protsesi 20 qańtarǵa deiin ýaqytsha onlain formatqa aýystyryldy", – dep habarlady Qazaqstan-Britan tehnikalyq ýniversitetiniń baspasóz qyzmeti.
QBTÝ ókilderi qazirgi ýaqytta oqiǵa sebepterin anyqtaý úshin quzyrly organdarmen birlesip tergeý júrgizilip jatqanyn atap ótti.
"Qazaqstan-Britan tehnikalyq ýniversiteti stýdentter men qyzmetkerlerdiń qaýipsizdigin qamtamasyz etý úshin barlyq qajetti sharany qabyldap jatyr. Ǵimarattyń órtke qarsy júieleri ýaqytynda iske qosylyp, ottyń taralýyn boldyrmaýǵa jáne shyǵyndy azaitýǵa múmkindik berdi. Qazirgi ýaqytta órttiń sebepteri anyqtalyp jatyr", – dep qosty ýniversitet ókilderi.
QBTÝ ǵimaratyndaǵy órt
11 qańtar keshkisin Almatyda tótenshe jaǵdailar qyzmeti QBTÝ ǵimaratyndaǵy órtke bailanysty Astana alańyn (Eski alań) jaýyp tastady. Tótenshe jaǵdailar ministrliginiń aldyn ala málimetinshe, "Tóle bi kóshesindegi ǵimaratta tórtinshi qabattaǵy bólmelerdiń birinde tóbe órtengen".
Keiin Almaty TJD bastyǵynyń orynbasary Chaizada Bagdat QBTÝ ǵimaratyndaǵy órt úshinshi deńgeili dep baǵalanǵanyn aitty.
"Shatyr janyp jatyr. Jasyryn janý oshaqtary bar. Úsh avtosaty ornalastyryldy, órt gidranty qosyldy. Ázirge órt oqshaýlanǵan joq", – dedi Almaty TJD bastyǵynyń orynbasary.
Oqiǵa ornynda jedel shtab quryldy. Órtti sóndirýge Almaty TJD-nyń 78 órt sóndirýshisi men 28 tehnika birligi jumyldyryldy.
