«QazMunaiGaz» UK AQ Basqarma tóraǵasy Alik Aidarbaev aldaǵy bes jylda kompaniianyń shyǵyndary ońtailandyrylyp, 730 mlrd teńge únemdeletinin málim etti, dep habarlaidy QazAqparat.
«Qaýipsizdik keńesiniń sońǵy otyrysynda jahandyq qaýiptiń ainalasyndaǵy jaǵdai alańdatarlyq stsenariimen órbip bara jatqanyn atap ótken edińiz. Biz qazirgi tańda álemdik qarjy naryqtary koronadaǵdarys saldaryn qanshalyqty aýyr ótkerip jatqanyn baqylap otyrmyz. Munai baǵasy tym tómendep ketken jaǵdailar da tirkeldi. Aktsiialardyń kotirovkasy da aitarlyqtai tómendep ketti. VR, Shell, Exxon Mobil qatarly munai-gaz menedjerleriniń báriniń de tabysy tómendedi. Keibiri tipti shyǵynǵa batty», - dedi Alik Aidarbaev Elbasy Nursultan Nazarbaevtyń tóraǵalyǵymen ótken «Samuryq-Qazyna» keńesiniń otyrysynda.
Onyń aitýynsha osyndai jaǵdaiǵa jaýap retinde «QazMunaiGaz» kompaniiasy birqatar shuǵyl shara qabyldaǵan.
«Birinshiden biz daǵdarysqa qarsy strategiia tujyrymdamasyn ázirledik. Ol bizdiń jumysymyzdyń negizgi úsh baǵytyn qamtidy. Birinshisi – qarjy salasy. Iaǵni «QazMunaiGazǵa» kelip jatqan qarjy aǵymyn arttyryp, qaryz júktemesin basqarý isine nazar aýdarylady. Ekinshisi – operatsiialyq jumystar. Shyǵynǵa batpaý úshin óndiristiń ońtaily deńgeiine mańyz beriledi. Úshinshisi – daǵdarystan keiingi damý, aktivter portfelin qaita qurylymdaý. Bul daǵdarysty iske asyrýdyń alǵashqy qadamy retinde qurylymdy ońtailandyryp, ortalyq apparattaǵy kadrlar sanyn qysqartý, sonymen qatar kompaniia basshylyǵynyń ailyǵyn azaitý jumysy tańdaldy. Artynsha kompaniialar toby boiynsha shyǵyndarly qysqarta bastadyq. Osylaisha jalpy shyǵyndar 2020 jyl boiynsha 146 mlrd teńgege deiin qysqartyldy. Aldaǵy bes jylda osy izben 730 mlrd teńgeni únemdegimiz keledi. Bul jumys jalǵasady. Ońtailandyratyn rezerv áli de bar degen oidamyz», - dedi Alik Aidarbaev.
«QazMunaiGaz» basshysy ońtailandyrýdyń qaǵidatyna jumys oryndaryn qysqartý da qosylatynyn aityp ótti.
