.jpg)
Keler jyly Nurǵisa Tilendievtiń týǵanyna 100 jyl tolady. Aty ańyzǵa ainalǵan dáýlesker kúishi, dirijer, kompozitordy qazirgi jastar tanyi ma?
ULT.KZ tilshisi bul suraqty Tilendievtiń 100 jyldyǵyna arnalǵan kontsertte onyń qyzy, «Otyrar sazynyń» kórkemdik jetekshisi jáne bas dirijeri Dinzýhra (Dinara) Tilendievaǵa qoidyq.
«Nurǵisa Tilendievtiń esimi halyqtyń jadynda máńgi saqtaýly. Men oǵan alańdamaimyn. Nurǵisa Tilendievtiń esimi eshqashan umytylmaidy. Jastardy qazir ónerge tartý kerek. Onyń joly - zamanaýi repertýarlardy oryndaý kerek. Búgingi kontsertte ózderińiz osyǵan kýá boldyńyzdar, estidińizder», -deidi Dinzýhra Tilendieva.
Dinzýhra Tilendieva ákesiniń qazaq ónerindegi orny men onyń sheteldegi tanymaldylyǵy týraly pikir bildirip, bylai dedi:
«Biz shetelge shyqqan saiyn Nurǵisa Tilendievtiń shyǵarmalaryn oryndaimyz. Sheteldegi jankúierlerimiz qazaq ónerin, Nurǵisa Tilendievti jaqsy biledi», -deidi Dinzýhra Tilendieva.
29 qarashada kompozitordyń ózi qurǵan «Otyrar sazy» folklorlyq-etnografiialyq orkestri Nurǵisa Tilendievtiń týǵan kúnin joǵary deńgeide atap ótý maqsatynda, Astanadaǵy Roza Baǵlanova atyndaǵy «Qazaqkontsert» memlekettik kontsert uiymynyń úlken zalynda kompozitordyń 100 jyldyǵyna arnalǵan «Otyrar sazy shaqyrady» kontsertin ótkizdi.
Aitýly merekeni atap ótýdiń mańyzy zor. Óitkeni, qazaqtyń birtýar azamaty kóziniń tirisinde elimizdiń ónerinde óshpestei iz qaldyrǵan. «Otyrar sazy» Astana tórinde kompozitordyń jadyn qaita jańǵyrtty deýge bolady.
Kontsert joǵary deńdeide oryndalyp, elorda turǵyndary men qonaqtary eki orkestrdiń jáne halyqaralyq baiqaýlardyń laýreaty E.Rahmadiev atyndaǵy memlekettik akademiialyq filarmoniiasynyń Kameralyq horynyń oryndaýynda Nurǵisa Tilendievtiń qazaq mýzykasynyń altyn qoryna engen shyǵarmalaryn tyńdady. Sondai-aq kórermenderge erekshe shyǵarmashylyq eksperiment usynyldy. Kóne qazaq halyq aspaptarynyń únimen qatar, «Vivo per lei», «The Prayer», «Melodramma», «Remember», «She» jáne «Shindler tizimi» filminen kompozitsiialar oryndaldy.
«Nurǵisa Tilendievtiń 100 jyldyǵyna daiyndyq ústindemiz»
«Otyrar sazy» ulttyq ónermen qatar ulttyq aspaptardyń únin álem arenasy deńgeiine jetkizý úshin qyzmet etip júrgen elimizdegi tanymal orkestrlerdiń biri. Ulttyq qundylyqtardyń dáripteýshisi «Otyrar sazynyń» ómirsheńdigi de osy bolsa kerek. Aldaǵy jyldarda orkestr, repertýaryndaǵy týyndylar qataryn kóbeitýdi josparlap otyr, odan bólek orkestr keler jyly keń kólemde atap ótiletin Nurǵisa Tilendievtiń 100 jyldyǵyna daiyndyq ústinde. Bul týraly Dinzýhra Tilendieva bólisti.
«Bizdiń repertýardaǵy týyndylar jańaryp otyrady. Onyń qataryn keńeitip oǵan zamanaýi repertýarlar qosý kerek. Alǵa qoiǵan josparlar kóp, solardyń biri keler jyly Nurǵisa Tilendievtiń 100 jyldyǵy, soǵan daiyndyq ústindemiz», - dedi Dinzýhra Tilendieva.
Sahnada elimizge tanymal óner ieleri qyzmet kórsetti. Kórermender jańa jaryq tehnologiialary arqyly júzege asatyn keremet shoýdy tamashalady. Sahnalyq jabdyqtar mýzyka siqyryn sezinýge múmkindik beretin erekshe atmosfera syilady.
«Otyrar sazy shaqyrady» kontsertiniń dirijerleri. N. Tilendiev atyndaǵy AFEO «Otyrar sazynyń» kórkemdik jetekshisi jáne bas dirijeri – QR eńbek sińirgen qairatkeri, «Qurmet» jáne «Parasat» ordenderiniń iegeri Dinzýhra Tilendieva, N. Tilendiev atyndaǵy AFEO «Otyrar sazy» orkestriniń dirijeri – QR eńbek sińirgen ártisi, «Qurmet» ordeniniń iegeri Jalǵasbek Begendikov boldy. Al, Simfoniialyq orkestrdiń dirijeri qyzmetin «Qurmet» ordeniniń iegeri Arman Jaiym atqardy. Kórkemdik jetekshiler. Simfoniialyq orkestrdiń kórkemdik jetekshisi jáne bas dirijeri – QR Halyq ártisi, «Qurmet» ordeniniń iegeri Abzal Muhitdin Kameralyq hordyń kórkemdik jetekshisi jáne bas dirijeri – QR eńbek sińirgen qairatkeri Gúlmira Quttybadamova.
Aita ketý kerek, «Otyrar sazy» folklorlyq-etnografiialyq orkestrine 1980 jyly Nurǵisa Tilendievtiń ózi negiz salǵan. Basynda «Otyrar sazy» qazaq filarmoniiasynyń janynan ansambl retinde qurylǵan. Búginde orkestrdiń repertýarynda halyq kúileri, «Keńes», «Sary ózen», «Sal kúreń», halyq kompozitorlarynyń shyǵarmalary, «Qosbasar», «Sarjailaý», Táttimbettiń «Sylqyldaǵy», «Erdenniń kúii», Yqylastyń «Qambar batyry», M. Tólebaevtyń «Eske alýy», Nurǵisa Tilendievtiń «Ata tolǵaý», «Qosh kerýeni», K. Kúmisbekovtyń «Qorqyt kúii», «Farabi sazy», taǵy basqa tanymal týyndylarmen qatar, sheteldik tanymal kompozitsiialar bar.
Bekbolat Muhtar
