Valiýtanyń aiyrbas baǵamynan paida tabýǵa tyrysýdyń esh máni joq. Mundai pikirdi búgin Úkimettiń selektorlyq rejimdegi otyrysynan keiin BAQ ókilderiniń saýalyna jaýap bergen QR Ulttyq banki tóraǵasy Daniiar Aqyshev bildirdi, dep habarlaidy QazAqparat.
«Qazaqstanda aiyrbas baǵasy erkindikke jiberilgen. Bul onyń negizinen Ulttyq banktiń qatysýynsyz qalyptasatyndyǵyn bildiredi. Iaǵni, ol suranys pen valiýta naryǵyndaǵy usynysqa orai qalyptasyp otyrady. Qazirgi ýaqytta oryn alyp otyrǵan jait syrtqy faktorlardy qosa alǵanda barynsha jaily», - dedi ol.
Osy rette Daniiar Aqyshev Qazaqstannyń syrtqy naryqqa shyǵaratyn eksporttyq ónimderiniń baǵasy kóterile túskendigin, soǵan orai elge keletin valiýtalyq túsim de artatyndyǵyn atap ótti.
«Bul rette atalǵan valiýtalyq túsimniń Qazaqstanǵa qanshalyqty jyldam jetetindigine jáne shetel valiýtasynyń qosymsha usynysyn qamtamasyz etýine bailanysty. Sonymen qatar, saýda seriktes elderdegi ahýaldyń jáne aiyrbas baǵamynyń da turaqty ekendigin kórip otyrmyz. Sondyqtan qandai da bir alańdaýshylyqqa negiz joq», - dedi ol.
Sonymen qatar Ulttyq bank tóraǵasy el azamattaryna aiyrbas pýnkterine júgirip, valiýta alýǵa jáne sodan paida tabýǵa tyrysýdyń qajeti joq ekendigin eskertti.
«Osy naryqta paida taýyp qalýǵa tyrysatyn azamattarǵa da, kásiporyndarǵa da taǵy bir márte aitqym keledi. Biz muny birneshe márte qaitaladyq ta. Aiyrbas baǵamy ózgergen kezde aiyrbas pýnktine júgirip, sodan paida tabýǵa tyrysýdyń esh máni joq. Shyǵynǵa batyp qalýǵa da bolady. Óitkeni, makroekonomikalyq ahýal jaqsy. Biz teńge baǵamy artyq baǵalanyp otyr dep sanaimyz. Onyń nyǵaia túsýi de yqtimal. Sondyqtan qazir valiýta satyp alyp jatqan adamdar utylatyn bolady», - dedi Daniiar Aqyshev.
