- Litsenziiasynan aiyrylǵan «Qazinvestbanki» AQ salymshylarynyń 99,7%-y ótemaqyny tolyq kólemde alady. Bul týraly búgin Almatyda ótken baspasóz máslihatynda belgili boldy.
Ótemaqynyń tólený tártibi týraly Qazaqstandyq depozitterdi kepildendirý qory mamandary aityp berdi.
«Salymshylardyń 99,7 %-y, 8292 salymshy zańmen kórsetilgen merzimde óz salymynyń ótemin alady. Al qalǵany kepildendirilgen soma sheńberinde alady. 0,3 paiyzy degenimiz salymy kepildendirilgen somadan, iaǵni 10-5 mln teńgeden asyp ketken tulǵalar. Mundai 52 salymshy bar. Olar eń sońynan ári jetispeitin somany taratý komissiiasynan alatyn bolady», - dedi depozitterdi kepildendirý qorynyń tóraǵasy Baqyt Qoǵylov.
«Qazinvestbankiniń» ýaqytsha ákimshiligi óz jumysyn bitirgen soń taratý komissiiasy qurylyp, sonyń sheńberinde tólem kezegi retteledi.
Bank salymshylaryna jalpy somasy 768 mln teńge berý tiis.
Qor basshysy eskertkendei, tólem ýaqyty sot sheshiminen soń belgili bolady. «Sot sheshimi kúshine engen soń 14 kún ishinde bank-agentti tańdap, iske kirisemiz», - dedi ol.
Tólem salymshy ótinim bergen kúnnen bastap 5 kún ishinde tólenýi tiis. Óz kezeginde, «Kazinvestbanki» AQ ýaqytsha ákimshiliginiń basshysy Djemma Zinýllina litsenziiadan aiyrylǵan kúnde de bank óz mindettemelerin óteýi tiis ekendigin atap ótti.
Aita ketý kerek, QR Ulttyq banki «Qazinvestbanki» AQ-ny qarjy naryǵynda qyzmet etýge múmkindik beretin litsenziiasynan aiyrǵan bolatyn.
Barlyq quqyqtar qorǵalǵan. inform.kz belsendi siltemeni paidalanyńyz http://www.inform.kz/kz/kazinvestbanki-ak-salymshylarynyn-99-7-y-otemakyny-tolyk-kolemde-alady_a2986447
