- ليتسەنزيياسىنان ايىرىلعان «قازينۆەستبانكٸ» اق سالىمشىلارىنىڭ 99,7%-ى ٶتەماقىنى تولىق كٶلەمدە الادى. بۇل تۋرالى بٷگٸن الماتىدا ٶتكەن باسپاسٶز مەسليحاتىندا بەلگٸلٸ بولدى.
ٶتەماقىنىڭ تٶلەنۋ تەرتٸبٸ تۋرالى قازاقستاندىق دەپوزيتتەردٸ كەپٸلدەندٸرۋ قورى ماماندارى ايتىپ بەردٸ.
«سالىمشىلاردىڭ 99,7 %-ى, 8292 سالىمشى زاڭمەن كٶرسەتٸلگەن مەرزٸمدە ٶز سالىمىنىڭ ٶتەمٸن الادى. ال قالعانى كەپٸلدەندٸرٸلگەن سوما شەڭبەرٸندە الادى. 0,3 پايىزى دەگەنٸمٸز سالىمى كەپٸلدەندٸرٸلگەن سومادان, ياعني 10-5 ملن تەڭگەدەن اسىپ كەتكەن تۇلعالار. مۇنداي 52 سالىمشى بار. ولار ەڭ سوڭىنان ەرٸ جەتٸسپەيتٸن سومانى تاراتۋ كوميسسيياسىنان الاتىن بولادى», - دەدٸ دەپوزيتتەردٸ كەپٸلدەندٸرۋ قورىنىڭ تٶراعاسى باقىت قوعىلوۆ.
«قازينۆەستبانكٸنٸڭ» ۋاقىتشا ەكٸمشٸلٸگٸ ٶز جۇمىسىن بٸتٸرگەن سوڭ تاراتۋ كوميسسيياسى قۇرىلىپ, سونىڭ شەڭبەرٸندە تٶلەم كەزەگٸ رەتتەلەدٸ.
بانك سالىمشىلارىنا جالپى سوماسى 768 ملن تەڭگە بەرۋ تيٸس.
قور باسشىسى ەسكەرتكەندەي, تٶلەم ۋاقىتى سوت شەشٸمٸنەن سوڭ بەلگٸلٸ بولادى. «سوت شەشٸمٸ كٷشٸنە ەنگەن سوڭ 14 كٷن ٸشٸندە بانك-اگەنتتٸ تاڭداپ, ٸسكە كٸرٸسەمٸز», - دەدٸ ول.
تٶلەم سالىمشى ٶتٸنٸم بەرگەن كٷننەن باستاپ 5 كٷن ٸشٸندە تٶلەنۋٸ تيٸس. ٶز كەزەگٸندە, «كازينۆەستبانكٸ» اق ۋاقىتشا ەكٸمشٸلٸگٸنٸڭ باسشىسى دجەمما زينۋللينا ليتسەنزييادان ايىرىلعان كٷندە دە بانك ٶز مٸندەتتەمەلەرٸن ٶتەۋٸ تيٸس ەكەندٸگٸن اتاپ ٶتتٸ.
ايتا كەتۋ كەرەك, قر ۇلتتىق بانكٸ «قازينۆەستبانكٸ» اق-نى قارجى نارىعىندا قىزمەت ەتۋگە مٷمكٸندٸك بەرەتٸن ليتسەنزيياسىنان ايىرعان بولاتىن.
بارلىق قۇقىقتار قورعالعان. inform.kz بەلسەندٸ سٸلتەمەنٸ پايدالانىڭىز http://www.inform.kz/kz/kazinvestbanki-ak-salymshylarynyn-99-7-y-otemakyny-tolyk-kolemde-alady_a2986447
