Qazaqstannyń jańa tarihyn júieli zertteý – bizge tarih artyp otyrǵan amanat, keler urpaq aldyndaǵy paryz. QR Prezidenti janyndaǵy Qazaqstan strategiialyq zertteýler institýtynyń direktory Zarema Sháýkenova Memleket basshysynyń «Táýelsizdik bárinen qymbat» atty maqalasyna orai osyndai pikir bildirdi, dep habarlaidy QazAqparat.
«Biyl – táýelsizdigimizdiń 30 jyldyǵy. Jahandy tarih úshin qysqa merzim bolsa da, otyz jylda «Táýelsizdik urpaǵyn» ósirip úlgergen Qazaqstan úshin bul qýatty, ári kemel halyq bolý mindetin júkteitin jańa beleske attanar mejeli kezeń.
Osyǵan orai Egemen Qazaqstan gazetinde jaryq kórgen maqalasynda Prezident táýelsiz memlekettigimizdiń tuǵyry – jer, til, mádeniet pen tarih, el birligi men qundylyq máseleleri tóńireginde oi qozǵady.
Jańa tarihty zerdeleý erekshe memleket nazarynda bolmaq. Bul turǵyda «Mádeni mura» baǵdarlamasy aiasynda atqarylǵan qajyrly jumystyń nátijesin qalyń jurtshylyqqa, ásirese jas býynǵa túsinikti túrde jetkizý halqymyzdyń tarihi sanasyn jańǵyrtýǵa zor úlesin qosady. Jaqyn arada Qazaqstan telearnalarynan Altyn Orda tarihy, Alash qairatkerleriniń taǵylymy jóninde kórkem jáne derekti tarihi týyndylar memleket qoldaýymen jaryq kóretin bolady», - dedi Zarema Sháýkenova.
Qazaqstan strategiialyq zertteýler institýty direktorynyń aitýynsha, maqalada tilge tiek bolǵa tarihymyzdyń aqtańdaq betterin zertteý, ulttyq múdde turǵysynan olarǵa baǵa berý halyqtyń rýhani jańǵyrýyna jańa serpin bermek.
«Alash qairatkerleriniń murasyna, HH ǵasyrdyń basynda qazaq dalasyn sharpyǵan asharshylyqqa, 1986 jylǵy Jeltoqsan oqiǵasyna ǵylymi turǵyda baǵa berý, Qazaqstannyń jańa tarihyn júieli zertteý – bizge tarih artyp otyrǵan amanat, keler urpaq aldyndaǵy paryz. Bul baǵyttaǵy jumys jas urpaqtyń sanasyn, ulttyń jadyn oiatyp, qazaqtyń san ǵasyrly tarihyn barsha halyqaralyq qaýymdastyqqa pash etýge múmkindik beretin memlekettik mańyzy bar is», - dedi Zarema Sháýkenova.
Onyń aitýynsha, Qazaqstannyń eko-júiesine janashyrlyq túptep kelgende naǵyz otanshyldyqtyń kórinisi.
«Altaidan Atyraýǵa, Alataýdan Arqaǵa deiingi ata-babadan muraǵa qalǵan keń baitaq qazaq jerin qasterleý, shynaiy otanshyldyq tanytyp keleshek urpaq úshin barynsha tabiǵi páktigin saqtaý – barlyǵymyzǵa ortaq mindet. Memleket tarapynan tiisti zańnama men is-qimyldar atqarylýda. Desek te, qoryqty jerlerge bai Qazaqstannyń eko-júiesin baptaý – barlyǵymyzǵa ortaq strategiialyq mańyzy bar mindet jáne túptep kelgende naǵyz otanshyldyqtyń kórinisi», - dedi Qazaqstan strategiialyq zertteýler institýtynyń direktory.
Zarema Sháýkenova dáiekti túrde iske asyrylýdy talap etetin taǵy bir sharýa retinde Prezident qandastar kóshin jańǵyrtý qajetteligin atap ótkenine toqtaldy. Halyq tyǵyzdyǵy árkelki Qazaqstan aimaqtary úshin bul eńbek kúshin tiisti deńgeide saqtap turýǵa, demografiialyq ahýaldy jaqsartýǵa múmkindik beretin erekshe mańyzy bar naýqan.
«Óz maqalasynda Prezident elimizdiń basty nyshandarynyń biri memlekettik til máselesine erekshe toqtaldy. Qazaq qalamgerleriniń úzdik shyǵarmalarynyń basylymy ulǵaitylyp, balalar aýditoriiasyna arnalǵan shetel avtorlarynyń tańdaýly týyndylary qazaq tiline aýdarylyp, osylaisha memlekttik til damýyna jańa serpin beriledi. Osy oraida barsha qazaqstandyqtar da til igerý men onyń úiretýde yntasyn tanytý qajet.
Búgingi kúni qazaq tilin oqýǵa qulshynatyn árbir qazaqstandyqty qoldaý, ol úshin jaǵymdy jaǵdai jasaý óte mańyzdy. Kez kelgen tildi úirenýde ortanyń mańyzy erekshe ekendigi bárimizge málim. Qazaq tilin endi ǵana meńgerip kele jatqan otandastarymyzǵa qateler jiberip alatyn jaǵdaida túsinistikpen qarap, toleranttylyq tanytý, barynsha qazaq tilin oqýǵa talpyndyratyn atmosfera qurý – bul árbirimizdiń qolynan keletin jáne túptep kelgende qazaq tiliniń deńgeiin ultaralyq qoldanys dárejesine kóterýge jol ashatyn kishkentai bolsa da, mańyzdy qadam», - dedi Zarema Sháýkenova.
Eske sala ketsek, búgin Qazaqstan Respýblikasynyń Prezidenti Qasym-Jomart Toqaev «Egemen Qazaqstan» gazetinde «Táýelsizdik bárinen qymbat» atty maqala jariialady.
.jpeg)