2020 jylǵy aqpan aiynyń sońynda Qazaqstannyń halyqaralyq qory 29,9 mlrd dollardy qurady. Bul ótken jyldyń osyndai kezeńimen (29,1 mlrd dollar) salystyrǵanda 2,6 paiyzǵa, osy jyldyń qańtarynan 1,9 paiyzǵa kóp, dep habarlaidy "Ult aqparat" Finprom.kz saityna silteme jasap.
Qorlardyń valiýtalyq bóligi sáýirdegi jaǵdai boiynsha birshama qysqaryp, ne bári 9,6 mlrd dollardy qurady. Al 2015 jyldyń aqpanynda onyń kólemi 21,3 mlrd dollar bolǵan edi. Halyqaralyq qordyń quramyndaǵy altyn kólemi qarqyndy ósip kele jatyr. Bir jyldyń ishinde Ulttyq banktyń altyn-valiýta qory qurylymyndaǵy monetarlyq altyn kólemi 33,7 paiyzǵa nemese 5,1 mlrd dollarǵa ulǵaiyp, 20,3 mlrd dollarǵa jetip otyr. Sońǵy 5 jyldyń ishinde altyn qorynyń úlesi 26,1 paiyzdan 67,9 paiyzǵa deiin artty.
Tolyqtai alǵanda, halyqaralyq qorlardyń ósimi altyn satyp alý operatsiialaryn júrgizý, sonymen qatar onyń álemdik naryqtaǵy baǵasynyń kóterilýi esebinen oryn aldy. Aitalyq, 2020 jyldyń 31 naýryzyndaǵy jaǵdaiǵa sáikes, altynnyń 1 ýntsiiasynyń baǵasy 1618,3 dollardy qurap, jyl basynan beri 5,4 paiyz ósti.
Aita keterligi, álemniń kóptegen damyǵan elderine memlekettiń altyn-valiýta qoryndaǵy altyn úlesi basym bólikti alady. Máselen, EO elderinde memleket qoryndaǵy altyn úlesi ortasha eseppen 58,6 paiyzdy quraidy. Osy jyldyń naýryzynda álem elderi ishinde AQSh-tyń altyn qory eń kóp boldy. Bul elde 8,1 myń tonna altyn bar. Al Qazaqstan altyn qory boiynsha jalpy álemdik reitingte 15-orynda tur. Elimizde 386,5 tonna altyn bar.
