Foto: elements.envato.com
Qazaqstannyń kei qalalarynda baspanany jalǵa berý baǵasy tómendei bastady. Keiingi aptada baǵanyń tómendeýi Petropavl, Aqtóbe, Pavlodar, Oral jáne Astana qalalarynda baiqaldy, - dep habarlaidy Tengrinews.kz agenttigi Krisha.kz saityna silteme jasap.
Krisha.kz sarapshylary keiingi aptadaǵy, iaǵni 5-12 qazandaǵy baǵa monitoringi derekterin usyndy. Reseide ishinara mobilizatsiia jariialanǵannan keiin alǵashqy aptalarda jalǵa berý baǵasy ósken qalalarda jaldaý aqysy tómendei bastady.
Máselen, bir apta ishinde aitarlyqtai arzandaý Petropavl men Aqtóbede (baǵanyń 14 paiyzdan asa tómendeýi, orta eseppen bir sharshy metrge shamamen 4400 teńge), sondai-aq Oral men Pavlodarda (10 paiyzdan asa) baiqaldy. Astanada keiingi aptada jalǵa beriletin turǵyn úi baǵasy 6,8 paiyzǵa arzandaǵan.
Bul rette Almaty, Aqtaý, Qaraǵandy, Óskemen, Shymkent qalalarynda jalǵa alý baǵasy qymbattaǵan. Bir aptada jalǵa berý baǵasy Almatyda birden 8,9 paiyzǵa (1 sharshy metr baǵasy 5 555 teńge), Aqtaýda 9,8 paiyzǵa (sharshy metri 3 035 teńge) ósken.
Almatyda jalǵa beriletin páterlerdiń arzandamaýy ishinara naryq qurylymynyń ózgerýine jáne arzan páterlerdiń tapshylyǵyna bailanysty ekeni atap ótildi. 12 qazandaǵy jaǵdai boiynsha páterlerdiń absoliýt baǵasy boiynsha qala kósh bastap tur – bir bólmeli páter 270 000 teńge, eki bólmeli páter - 500 000, úsh bólmeli páter 750 000 teńge. Astana baǵa boiynsha ekinshi orynda – bir bólmeli páter 250 myń teńge, eki bólmeli páter 350 myń, úsh bólmeli páter 500 myń teńge.
