Búgin Nur-Sultan qalasynda ótken Qazaqstan musylmandary dini basqarmasynyń kezekten tys IH quryltaiynda Serikbai qajy Oraz QMDB tóraǵasy, Bas múfti qyzmetine Naýryzbai qajy Taǵanulynyń kandidatýrasyn usyndy, dep habarlaidy QMDB baspasóz qyzmeti.
QMDB baspasóz qyzmetiniń málimetinshe, quryltaiǵa jinalǵan 300 delegat Serikbai qajy Orazdyń usynǵan kandidatýrasyna biraýyzdan daýys berip, qoldaý kórsetip, Naýryzbai qajy Taǵanulyn Bas múftilikke sailady.
«Naýryzbai qajy Taǵanuly meniń birinshi orynbasarym retinde kóptegen igi jobalardy júzege asyrdy. Dini salada tájiribesi mol. Naýryzbai qajy Taǵanulynyń Dini basqarma jumysyn jandandyryp, jańa bastamalarǵa uiytqy bolatynyna senemin», – dedi Serikbai qajy Oraz.
Quryltaiǵa qatysqan QR Aqparat jáne qoǵamdyq damý ministri Dáýren Abaev Serikbai qajy Orazdyń 2017-2020 jyldary atqarǵan jumysyna oń baǵa berip, QMDB tóraǵasy, Bas múfti Naýryzbai qajy Taǵanulynyń jańa qyzmetine sáttilik tiledi. Sonymen qatar, dini saladaǵy ortaq sharalardy birlese júzege asyrýǵa niettestik bildirdi.
Aita keteiik, Naýryzbai qajy Taǵanuly osyǵan deiin QMDB tóraǵasynyń Birinshi orynbasary, «Áziret Sultan» meshitiniń Bas imamy qyzmetin atqardy. Ótpenov Naýryzbai Taǵanuly 1977 jyldyń 13 naýryzynda dúniege kelgen.
Tashkenttegi «Imam Ál-Buhari» atyndaǵy Islam institýtyn, QMDB janyndaǵy Islam institýtyn, Abai atyndaǵy Almaty memlekettik ýniversitetiniń magistratýrasyn, «Nur-Múbárák» Mysyr islam mádenieti ýniversitetiniń PhD doktorantýrasyn bitirgen. Mysyr Arab Respýblikasynda qysqa merzimde dini bilimin jetildirgen.
Respýblikamyzdyń túrli meshitterinde imamdyq qyzmet atqarǵan. QMDB-nyń Qaraǵandy óńirindegi ókili, Qaraǵandy qalalyq №1 ortalyq meshitiniń Bas imamy, QR Din isteri agenttigi Dini birlestiktermen bailanystar jónindegi basqarmasynyń bas sarapshysy, QMDB tóraǵasynyń birinshi orynbasary, naib múfti, QMDB-nyń Astana qalasy boiynsha ókili, «Nur Astana» ortalyq meshitiniń Bas imamy, QMDB tóraǵasynyń birinshi orynbasary, naib múfti, QMDB-nyń Túrkistan qalasyndaǵy keńse basshysy, Túrkistan oblysy boiynsha ókil imam bolǵan.
2018 jyldyń qazan aiynan bastap QMDB tóraǵasynyń birinshi orynbasary, naib múfti, QMDB-nyń Nur-Sultan qalasy boiynsha ókili, «Áziret Sultan» meshitiniń bas imamy qyzmetin atqarǵan.
