Ulttyq bank tóraǵasy Erbolat Dosaev Qazaqstannyń altyn valiýta qory 3,1%-ǵa ulǵaiyp, 31,5 mlrd AQSh dollaryna jetkenin málimdedi, dep habarlaidy QazAqparat.
«Ulttyq banktiń altynvaliýta rezervteri mamyrda 3,1%-ke nemese 950 mln AQSh dollaryna ulǵaiyp, 31,5 mlrd AQSh dollaryn qurady. Altyndy Ulttyq qorǵa 250 mln AQSh dollaryna satý jáne altyn baǵasynyń bir ýntsiia úshin 1 717-den 1 726 dollarǵa deiin ósýi esebinen altyn portfeli azdap 137 mln AQSh dollaryna azaidy», - dedi Erbolat Dosaev Úkimet otyrysynda.
Sonymen qatar Ulttyq qordyń aktivteri mamyrda ótken aiǵa qaraǵanda aitarlyqtai ózgermei, 58,5 mlrd AQSh dollaryn quraǵan. Mamyrda Ulttyq qordan respýblikalyq biýdjetke kepildi transfert retinde shamamen 1,6 mlrd AQSh dollary balamasynda 650 mlrd teńge bólingen.
«2020 jyldyń mamyrynda Ulttyq qordan kepildi transfert bólý úshin 1,1 mlrd AQSh dollary somasyna valiýta satyldy. 384 mln AQSh dollary mólsherindegi shetel valiýtasynyń túsimi jáne mamyrdaǵy aktsiialar naryǵynyń ishinara qalpyna kelýi nátijesinde alynǵan 670 mln AQSh dollary mólsherindegi investitsiialyq kiris Ulttyq qordan satylymdardyń ornyn toltyrdy. Halyqaralyq jalpy rezervter aǵymdaǵy bir aidyń ishinde 1%-ke ulǵaiyp 90 mlrd AQSh dollaryn qurady», - dedi ol.
