Nobel syilyǵynyń laýreaty Sviatoslav Timashev aqparattyq texnologiialardyń keńinen damyǵanyn qalaidy. Alaida osy salada tehnologiialyq bodandyqtan saq bolý qajet, dep xabarlaidy QazAqparat.
«Aqparattyq infraqurylymdy damytqan durys. Ol jaqsy. Sonyń arqasynda adam ómiri yńǵaily bolady. Úige kirmei jatyp, jaryqty qosa alasyń jáne taǵysyn taǵy. Alaida onyń keri tusy da bar ekenin umytpaý qajet. Mysaly, Huawei, Cisko, IBM siiaqty kompaniialar aqparattyq infraqurylymǵa qajetti datchikterdi jáne taǵy basqa qurylǵylardy satady. Mine, sonyń bárin satyp alǵannan keiin biz eriksiz ol texnologiialardyń qulyna ainalamyz. Kim biledi, erteń bireý ony óz múddesi úshin paidalanýy ábden múmkin. Sondyqtan aqparattyq infraqurylymdy jasaǵanda onyń negizi ózińdiki bolýy qajet. Meili, temirdi shetelden satyp al, biraq ony basqaratyn mamandar jergilikti aimaqtyń adamdary bolýy shart. Sosyn temirdi alǵan kúnniń ózinde «jýchoktar» bar ma, joq pa, tolyǵymen tekserip shyǵý qajet», - dedi Timashev jýrnalisterge bergen suxbatynda.
Osy oraida ǵalym keńestik zamannyń jaǵymsyz bir tájiribesin eske aldy. Ol kezde amerikalyq kompiýterlerdi satyp alǵanda ishinde arnaiy bloktar bolǵan. Sol arqyly teńizdiń arǵy jaǵynda otyrǵandar barlyq aqparatty bilip jatty.
«Kezinde Polsha óz jerindegi jylý elektr stansalaryna sheteldiń qural-jabdyqtaryn satyp aldy. Barlyq qondyrǵylar arzanǵa tústi. Alaida ol qural-jabdyqtar búkil respýblikaǵa tarap, jylý elektr stansalarynyń negizgi apparatýrasyna ainalǵanda sheteldik kompaniia qajetti bólshekterdiń baǵasyn birden kóterip tastady. «Nege qymbat?» dep suraǵanda, «Alsań al, almasań qoi! dep jaýap bergen eken. Amal joq, soǵan táýeldi bolyp qaldy. Sóitip, ol kompaniia Polshanyń monopolisi bolyp shyǵa keldi», - dep atap kórsetti Timashev.
Aita keteiik, búgin QR Prezidenti Nursultan Nazarbaev bir top sheteldik ǵalymdarmen kezdesti. Olardyń arasynda Nobel syilyǵynyń laýreattary, tanymal professorlar, kompaniia basshylary men burynǵy prezidentter bar. Barlyǵy Astana ekonomikalyq forýmyna qatysýǵa keldi. Prezident olardy Aqordada qabyldap, álemdegi saiasi-ekonomikalyq júieniń qalaisha ózgerip jatqanyn jetkizdi.
