QR Premer-Ministri Memlekettik týdy úilerdiń qasbetine, balkondarǵa ilýge ruqsat beretin qaýlyǵa qol qoidy, dep habarlaidy "Ult aqparat".
«Qazaqstan Respýblikasynyń Memlekettik Týyn, Memlekettik Eltańbasyn jáne olardyń beinelerin, sondai-aq Qazaqstan Respýblikasy Memlekettik Gimniniń mátinin paidalaný (ornatý, ornalastyrý) qaǵidalaryn bekitý týraly» Qazaqstan Respýblikasy Úkimetiniń 2007 jylǵy 2 qazandaǵy № 873 qaýlysyna ózgerister engizý týraly« №801 qaýlynyń 4-tarmaǵynyń birinshi bóliginde bylai dep jazylǵan:
«Qazaqstan Respýblikasynyń Memlekettik týyn jeke jáne zańdy tulǵalar ǵimarattarda (turǵyn úi turǵyn úi emes úi-jailarda), onyń ishinde balkondar men saltanatty sharalar ótetin oryndarda patriottyq sezimderin, qazaqstandyq biregeilikti bildirý, eldiń, onyń azamattarynyń jetistikterin qoldaý maqsatynda paidalana (ornatý ornalastyrý) alady».
Buǵan deiin Prezident Qasym-Jomart Toqaev memlekettik týdy keńinen qoldaný týraly usynysty qoldaitynyn aitqan bolatyn.
Parlamenttiń birqatar depýtaty men patriot azamattardyń elimizdiń memlekettik rámizderin, atap aitqanda, QR memlekettik týyn keńinen qoldaný týraly usynysyn qoldaimyn. Qoldanystaǵy zańnamada týymyzdy paidalanýǵa qatysty shekteýler bar. Mysaly páterlerdiń balkonyna nemese úilerdiń qabyrǵasyna tý ilýge tyiym salynǵan. Zańnamalyq jáne normativtik aktilerdi, eń aldymen, Memlekettik rámizderdi paidalaný qaǵidalaryn qaita qaraý qajet, - dep jazdy Qasym-Jomart Toqaev Twitter-degi paraqshasynda.
Buǵan deiin qazaqstandyqtar "Men týymdy maqtan etemin" fleshmobyn uiymdastyrǵan bolatyn. Ol atyshýly "Borat-2" filminiń shyǵýyna bailanysty qolǵa alyndy. Filmge Qazaqstan týyn paidalanyp, jarnama jasalýy halyq narazylyǵyn týdyrdy.
Britandyq komik Sasha Baron Koen "Borat" jáne "Borat-2" filminde nege Qazaqstan atyn paidalanǵanyn aitty. Onyń sózine qaraǵanda, bul – komediia, filmdegi Qazaqstan men naqty eldiń arasynda eshqandai bailanys joq. Qazaqstandy AQSh-ta eshkim bilmeitin bolǵan soń tańdaǵan. Koen naǵyz Qazaqstan – zamanaýi, abyroily qoǵamy bar, Borattyń nusqasyna qarama-qaishy tamasha el ekenin aityp aqtaldy.
