Reseilik bankterge qarsy sanktsiialar engizilgeli beri zańdy jáne jeke tulǵalardyń qansha qarajaty buǵattaldy? Depýtattar joldaǵan osy suraqqa Qarjy naryǵyn retteý jáne damytý agenttiginiń tóraǵasy Madina Ábilqasymova jaýap berdi, dep habarlaidy Ulysmedia.kz.
Agenttik basshysynyń aitýynsha, sanktsiialyq talaptar aiasynda jekelegen sheteldik bankter Sberbank, Alfa-Bank pen Bank VTB-nyń (Qazaqstan) shetel valiýtasyndaǵy korrespondenttik shottaryn buǵattaǵan. Osynyń saldarynan bankterdiń málimeti boiynsha, atalmysh bankterdiń shottaryndaǵy jalpy somasy shamamen 9,2 mlrd teńge (Sberbanktegi 2,7 mlrd teńge, Alfa-Banktegi 6,2 mlrd teńge, Bank VTB (Qazaqstan)-daǵy 0,3 mlrd teńge) bolatyn qaldyqtar buǵattalǵan.
«Budan basqa, sheteldik bankter Sberbanktiń jekelegen klientteri boiynsha 2,9 mlrd teńge somadaǵy shetel valiýtasyndaǵy tólemderdi buǵattaǵan. Alfa-Bank klientteri boiynsha jekelegen klientter boiynsha 3,9 mlrd teńge somasyndaǵy shetel valiýtasyndaǵy tólemder men aýdarymdar buǵattaldy. Qazir banktiń jańa aktsioneri Bank TsentrKredit AQ bankti AQSh pen birqatar basqa elderdiń sanktsiialyq tiziminen shyǵarý jumystaryn júrgizýde. «Bank VTB (Qazaqstan)» klientteri boiynsha olardyń tólem jáne aýdarym operatsiialary sheńberinde qarajattardy oqshaýlaý nemese buǵattaý faktileri joq», - dep jaýap beredi agenttik basshysy.
Sberbank pen Alfa-Bankta sheteldik bankter qaitarǵan klientter qarajatynyń somasy boiynsha aqparat joq. Sebebi olar arqyly operatsiialar júzege asyrylǵan bankterdiń korrespondenttik shottary buǵattalǵan. Buǵattalǵan qarajat klientterge basqa bankter arqyly qaitarylýy múmkin.
«Operatsiialardy buǵattan bosatý úshin bankterdiń klientteri óz betinshe AQSh retteýshisiniń (OFAC) internet-resýrsynda arnaiy nysandy toltyrý arqyly onyń jeke ruqsatyn alýy qajet. Qazirgi ýaqytta bankter óz klientterine kontragent banktermen kelissózderdi júzege asyrý jáne OFACtyń jeke litsenziiasyn alý tártibi týraly aqparat usyný arqyly kómek kórsetýde. 2022 jylǵy 5 mamyrda «Bank TsentrKredit» AQ «Alfa-Bank» AQ EB satyp alǵany belgili. «Bank TsentrKredit» AQ «Alfa-Bank» AQ EB-ni aktsionerdiń aýysýyna bailanysty SDN tiziminen shyǵarý úshin bas litsenziia alý maqsatynda OFAC-qa hat joldady, ony alǵannan keiin onyń korrespondenttik shottaryn jáne klientterdiń qarajatyn tolyq buǵattan bosatý kútilýde», - deidi Madina Ábilqasymova.
Sheteldik bankterdiń korrespondenttik shottaryndaǵy Sberbank jáne Alfa-Bank qarajatyn buǵattaýmen jáne olardyń klientteriniń qarajatyn oqshaýlaýmen bailanysty qalyptasqan jaǵdai Qazaqstannyń bank sektory basynan keshirip otyrǵan syrtqy geosaiasi táýekeldermen bailanysty.
«Osy oraida, klientter eki bankke qatysty shyǵynyn óteý boiynsha azamattyq talap aryz bergen jaǵdaida, mundai talaptardy bankter sot organdarynyń sheshimderine sáikes qanaǵattandyratyn bolady», - deidi Madina Ábilqasymova.
