Parlament Senaty Salyq kodeksine engiziletin túzetýlerdi qabyldady. Oǵan sáikes azamattar zeinetaqy jinaǵyndaǵy qarjynyń bir bóligin alǵan kezde bir rettik tabys salyǵyn tólemeýge múmkindik alady, dep habarlaidy "Ult aqparat".
Buǵan deiin Memleket basshysy Qasym-Jomart Toqaev 2021 jyldan bastap azamattarǵa zeinetaqy jinaǵynyń bir bóligin paidalanýǵa múmkindik berý jóninde tiisti memlekettik organdarǵa tapsyrma bergen edi. Alaida bul qarajat úshin tabys salyǵyn tóleý qajet. Dál osy másele qoǵamda narazylyq týdyrdy.
Sondyqtan senatorlar bul tólemdi keiinge shegerýdi jáne birneshe jylǵa bólip tóleýdi usyndy. Iaǵni, zeinetaqy jinaǵyndaǵy qarjyny kelesi jyldan bastap alýǵa bolady. Al oǵan tiisti salyq tek zeinetke shyqqan kezde ǵana tólenedi. Sondai-aq, tólemdi birden jasamai, 16 jylǵa bólip tóleý múmkindigi qarastyrylǵan.
«Zeinetaqy jinaǵyndaǵy qarjynyń bir bóligin aldyn ala alǵan kezde onyń 10 paiyzyn bir rettik salyq retinde tóleý kerek. Ony qazirgidei kúrdeli kezeńde azamattar úshin tiimsiz dep esepteimiz. Sondyqtan atalǵan salyqty zeinetaqy jinaǵyn alǵan kezde emes, tek zeinetke shyqqan soń ǵana tóleý usynylyp otyr. Onyń ózinde, bárin birden aýdarmai, zań jobasyna 16 jyldyń ishinde bólip tóleý týraly norma engizildi», – dedi Senat Tóraǵasy Máýlen Áshimbaev.
Al azamattyǵyn aýystyrǵysy kelgender zeinetaqy jinaǵynan aqsha alǵany nemese onyń bir bóligin paidalanǵany úshin tólenetin salyqty birden jáne tolyq óteýge mindetti. Osy rette salyq BJZQ (Biryńǵai jinaqtaýshy zeinetaqy qory) shotynda qalǵan zeinetaqy jinaǵynan ustalatynyn atap ótken jón.
