QR Densaýlyq saqtaý ministrligi dene jattyǵýymen shuǵyldanýdyń úlgilik qaǵidalaryn bekitti, dep habarlaidy "Ult aqparat".
Dene jattyǵýymen shuǵyldanýdy júrgizýdiń úlgilik qaǵidalary 2020 jylǵy 7 shildedegi «Halyq densaýlyǵy jáne densaýlyq saqtaý júiesi týraly» kodeksi 84-babynyń 4-tarmaǵyna sáikes ázirlengen jáne dene jattyǵýymen shuǵyldanýdy júrgizý tártibin aiqyndaidy.
Uiymdarda dene jattyǵýy jumys ýaqytynda ótkiziledi. Jumys berýshi jumystyń túrine, eńbek jaǵdaiyna, jumyskerdiń jasyna jáne jynysyna bailanysty dene jattyǵýlary keshenin ázirleidi.
Dene jattyǵýlary ótkiziletin úi-jai únemi taza bolady. Dene jattyǵýyn bastar aldynda aldyn ala jeldetiledi. Ár shuǵyldanýshyǵa orta eseppen qaýipsiz jerdi qamtamasyz ete otyryp, úi-jaidyń keminde 1,5 metr bos alańy bolýy tiis. Dene jattyǵýy uzaqtyǵy 10-15 minýttan aspaityn jumys kúniniń birinshi jartysynda júrgiziledi. Dene jattyǵý keshenin ár 3-4 apta saiyn ózgertý kerek.
Dene jattyǵýynyń kesheni 2-3 minýtqa sozylatyn boi jazý jáne negizgi gimnastikadan turady.
Boi jazý bas pen deneni sozýdan jáne baiaý eńkeiýden, burylýdan nemese aiaqtyń ushymen júrýden jáne qol-aiaqtyń ainalmaly qozǵalysynan turady.
Negizgi gimnastika eńkeiýdi (turǵan qalpynda da, otyrǵan qalpynda da), otyryp turýdy jáne deneniń bólikteri - bas, qol (iyq, shyntaq, qol), aiaqpen (jambas, tize, aiaq) jasalatyn ártúrli ainalmaly jattyǵýlardy qamtidy.
Dene jattyǵýy kezindegi júktemeni, jattyǵýlardyń árqaisysynyń qaitalaný sanyn kóbeitý nemese azaitý, olardyń jyldamdyǵy men jeke qozǵalys qarqynyn ózgertý, demalý úshin intervaldardy engizý arqyly rettei otyryp birtindep ulǵaitady.
