QR Bilim jáne ǵylym ministrligi ǵylym komitetiniń tóraiymy Janna Qurmanǵalieva vaktsina ázirlep jatqan Biologiialyq qaýipsizdik problemalary ǵylymi-zertteý institýty ǵalymdarynyń jumys jaǵdaiyn aityp berdi, dep habarlaidy "Ult aqparat".
«Ǵalymdardyń eńbekaqysyn kóterýge qarajat bólindi. Respýblikalyq biýdjet komissiiasy jaqynda ótti jáne bul sharany qoldady. Institýttyń ǵylymi qyzmetkerleriniń ortasha jalaqysy 325 myń teńgeden bastalady. Ákimshilik jáne qyzmet kórsetý personalynyń jalaqysy 250 myń teńgege deiin bolady», - dedi Qurmanǵalieva Ortalyq kommýnikatsiialar qyzmetinde ótken baspasóz máslihatynda.
Ol biologiialyq qaýipsizdikti qamtamasyz etý máselelerin ǵylymi zertteýge 2022-2024 jyldary 2,8 milliard teńge (jylyna milliard teńgeden) bólingenin atap ótti.
«Institýt janynda ǴZI qyzmetkerlerine arnalǵan úsh úi, jalpy kólemi 180 páter salynyp jatyr. Jýyrda ǵana osy 180 páterge turmystyq tehnika, jihaz jáne ózge de jabdyqtar satyp alýǵa respýblikalyq biýdjetten 293 million teńge bólindi. Bizdiń ǵalymdar men institýt qyzmetkerleri osy páterlerge kirgende jaily ómir súrý úshin barlyq qajetti zattarmen qamtamasyz etiledi», - dep atap ótti Qurmanǵalieva.
