Búgin Parlament Májilisiniń jalpy otyrysynda «Tehnikalyq retteý týraly» zań jobasy birinshi oqylymda maquldandy, dep habarlaidy QazAqparat.
Ekonomikalyq salalarda tehnikalyq retteýdi kúsheitý baǵytyna toqtalǵan QR Saýda jáne integratsiia ministri Baqyt Sultanov: «Eýraziialyq ekonomikalyq odaq aiasynda kelissózder pozitsiiasyn sapaly qalyptastyrý maqsatynda salalyq memlekettik organdar janynda Saraptamalyq keńester qyzmetin qaita qurý kózdelýde. Qazaqstandyq tehnikalyq reglamentterdi ázirleýdiń tártibi qaita qaralady. Biznes úshin erikti sertifikattaý júiesin qurýdyń quqyqtyq tetigi belgilenedi», - dedi.
Onyń aitýynsha, Qazaqstanda tiisti zerthanalyq praktikany damytý máselesine asa kóńil bólinedi. Ol úshin ulttyq akkreditteý ortalyǵyna monitoring organynyń fýnktsiialaryn tiisti zerthanalyq praktikaǵa berý kózdeledi. Bul Ekonomikalyq yntymastyq jáne damý uiymy (EYDU) elderinde qazaqstandyq synaq hattamalaryn tanýǵa serpin beredi.
«Atalǵan normalar qazaqstandyq taýarlardy syrtqy naryqqa shyǵarý, otandyq óndirýshilerdiń básekelestik artyqshylyǵyn qorǵaýǵa jáne Qazaqstanǵa tiimdi pozitsiialardy kásibi túrde qorǵaýǵa baǵyttalǵan», - dedi B. Sultanov.
Aita keteiik, zań jobasynda ishki naryqty «tazartý» eskerilgen. Bul máseledegi zańnamalyq jańalyǵy – sýbektilerdiń baqylaýynan obektilerdiń baqylaýyna kóshý. Iaǵni óndirýshi nemese satýshy emes, ónimniń ózi tekseriletin bolady.
Sonymen qatar, sertifikattaý kezinde synaq nátijeleriniń durystyǵyn 100 paiyzǵa deiin jetkizý kútilýde jáne sertifikattalmaǵan ónimdi tolyq baqylaýǵa alýǵa múmkindik beriledi
«Atalǵan erejelerdi zańnamalyq turǵydan bekitý - aitarlyqtai oń nátijelerge ákeletinin jáne Úkimettiń arsenalynda bar tehnikalyq retteý ári tutynýshylardyń quqyqtaryn qorǵaý quraldaryn tolyq paidalanýǵa negizin qalaidy. Sondai-aq, usynylyp otyrǵan jana zańnamalyq baza memleket úshin baqylaý-qadaǵalaý qyzmetiniń aiqyndyǵyn arttyrýǵa, qaýipti ónimge naryqqa jol bermeýge, sybailas jemqorlyq qaýpin tómendetýge, biznes úshinadal kásipkerlikke jaǵdai jasaýǵa, tutynýshy úshin neǵurlym sapaly ónimdi tańdaýǵa múmkindik beredi», - dedi ministr.
Jalpy otyrysta «Qazaqstan Respýblikasynyń keibir zańnamalyq aktilerine tehnikalyq retteý máseleleri boiynsha ózgerister men tolyqtyrýlar engizý týraly» ilespe zań jobasy da birinshi oqylymda maquldandy.
