Prezident Nursultan Nazarbaevtyń «Uly dalanyń jeti qyry» atty maqalasy Ankarada Túrkiiada bilim alyp júrgen qazaqstandyq stýdentter arasynda talqylandy. Aita keterligi, tálimgerlermen belgili saiasattanýshy, tarihshy ǵalym Berik Ábdiǵaliuly kezdesken bolatyn.
Kezdesý barysynda jýrnalistika, tarih, kompiýter injeneriiasy, dintaný siiaqty túrli mamandyqtarda magistratýra men doktorantýrada oqyp júrgen stýdentter Prezident Nazarbaevtyń maqalasyn jyly qabyldaǵanyn, ondaǵy maqsat-mindetterdiń mańyzdylyǵyn atap ótti. Máselen, Koniia qalasynan kelgen filolog Eldos Súleimen «Arhiv-2025» jobasynan kóp úmit artatynyn, álemde Qazaqstanǵa qatysty ashylmai jatqan derektiń kóp ekendigine nazar aýdartty. Al, dombyrashy Erjan Arqabai ortaq mádeniet pen mýzykanyń, ádebiet pen filosofiianyń túrki álemi úshin mańyzyn alǵa tartady. Onyń ózi de Ankarada dombyra kýrsyn ashqan. Baba murasyna qyzyǵýshylar sany kún sanap artyp keledi eken.
Óz kezeginde Berik Ábdiǵali Elbasy maqalasy halyqtyń rýhyn kótergenin atap ótti. «Babalarymyzdyń atty álemde alǵash qolǵa úiretkeni bizge maqtanysh sezimin syilaidy. Buryn da biletinbiz, biraq ony Elbasynyń aitqany bólek. Óitkeni bizge shyn máninde maqtanysh sezimi jetispei júr. Ol sezim - jurtty rýhtandyrady. Rýh degenimiz - ulttyq kod, qazaqsha aitqanda - tektilik. Tek ketpeidi, ózin izdeidi. Biz ókinishke qarai, sonshama jyl bodandyqta bolyp azat rýhymyzdy túsirip aldyq. Ózimizdi kóshten keiin qalǵandai sezinetin kompleks, kembaǵaldyq sana paida boldy. Sondyqtan da biz durys maqtana bilmei júrmiz. Osydan arylýdyń joly Elbasy maqalasynda anyq kórsetilgen», - deidi Berik Ábdiǵali.
Onyń aitýynsha, memlekettik sanany kóterip, rýhty biiktetin tarihtaǵy esimi uly tulǵalar, batyrlar men erlik dastandary. Sondyqtan ultty biriktiretin tulǵalardyń erlikteri, handarymyzdyń qairatkerligi, danalardyń daralyǵy urpaqqa kóbirek nasihattalýy shart.
«Qazaq halqy ǵasyrlar boiy janshylyp kelgen batyrlyq rýhyn qalpyna keltire almai jatyr. Ulttyń ulttyq kody ashtyqtan, repressiia men qýdalaýdan báseńsip qaldy. Sondyqtan, Ulttyq rýhymyzdy tiriltýge, memlekettik sanamyz ben ulttyq tutastyǵymyzdy qalyptastyrýǵa, keýdesin maqtanysh kernegen halyq bolýymyzǵa, tutas tarihi sana-sezimdi qalyptastyrýǵa Elbasy maqalasynyń mańyzy zor. Osy maqala aiasynda ǵalymdarǵa úlken júk artylyp otyr. Arǵy tegimizdi zerttep, uly halyqtyń murageri ekenimizdi dáleldeý, derekterdi ǵylymi ainalymǵa engizý ǵalymdardyń jumysy», - dedi Berik Ábdiǵali.
.jpeg)