Qytaidyń Ýsi qalasyndaǵy semserlesýden álem chempionatyna qatysyp jatqan qazaqstandyqtar jarysqa aza tutý belgisin taǵyp shyqty, dep habarlaidy QazAqparat.
«Sochi Olimpiadasynyń qola júldegeri, mánerlep syrǵanaýshy Denis Tenniń mezgilsiz qazasy búkil álem halqyn aýyr qaiǵyǵa dýshar etti. Talantty sportshy, aiaýly ul, namysty otandasymyzdyń qazasyna bailanysty el sportshylary ózderi qatysyp jatqan týrnirlerge aza tutý belgisin taǵyp shyqpaq. Qytaidyń Ýsi qalasyndaǵy semserlesýden álem chempionatyna qatysyp jatqan qazaqstandyq noiandar jarysqa aza tutý belgisin taǵyp shyqty», - dedi QR Ulttyq olimpiadalyq komitetiniń baspasóz qyzmetinde.
Sondai-aq atap ótilgendei, elimizdegi barlyq sporttyq federatsiialar ótkizetin resmi ári resmi emes týrnirler bir minýttyq únsizdikpen bastalady.
Aita keteiik, keshe Qazaqstan premer-ligasynda óner kórsetetin «Qairat» jáne «Tobyl» klýbtary matchtaǵy jeńisin Denis Tenniń rýhyna arnady.
Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraiynda ótedi. Bastalýy - saǵat 10:00-de. Sondai-aq bir mezgildegi qoshtasý rásimi 21 shilde kúni Astanada qalasyndaǵy "Barys-Arena" stadionynda ótedi.
