.jpg)
Sarapshylar balalardy bólip jarmai járdemaqyny bárine birdei berýdi usynyp otyr. Pikirlerinshe, áleýmettik tólem otbasynyń tabysyna, mártebesine, bala sanyna qarai úlestirilmeýi tiis.
31-arnanyń Informbiýro jańalyqtar baǵdarlamasynyń habarlaýynsha, bul memlekettik qoldaýdyń shyn muqtaj jandarǵa jetýine sep bolady deidi. Óitkeni járdemaqy alatyndar qatarynda tabysy jetkilikti otbasylar da bar. Al jalǵyzbasty ata-analar áleýmettik tólemnen qaǵylyp otyr.
Qazir elde balalarǵa beriletin járdemaqy túri de, mólsheri de kóp emes. Bala kútimi úshin áleýmettik tólem 1,5 jyl boiy tólenedi. Soma – shamamen 22 myń teńge. Sondai-aq kópbalaly otbasylarǵa bala sanyna qarai úlestiriledi. Tórt balaǵa 60 myń teńge jáne ári qarai 4 ailyq eseptik kórsetkish kóleminde ulǵaiyp otyrady.
Biraq ul-qyzyn jalǵyz tárbielep júrgen ata-analarǵa járdemaqy berilmeidi. Sondyqtan "Halyq finans" sarapshylary ámbebap járdemaqy engizýdi usynyp otyr. Soǵan sáikes, tólem taǵaiyndalýy úshin otbasynyń tabysy, bala sany, mártebesi eskerilmeýi tiis.
Alaida sarapshy Janar Jandosova járdemaqyny otbasynyń áleýmettik jaǵdaiy men mártebesine qaramai taǵaiyndaý ázirge múmkin emes deidi. Óitkeni barlyq balany tólemmen qamtamasyz etýge biýdjet qarjysy jetpeidi. Qazir úkimet járdemaqy úshin jalpy ishki ónimniń nebári 0,5%-yn bólip otyr. Bul – shamamen 500 milliard teńge.
"Biz damyǵan elder sekildi jalpy ishki ónimniń 2-3%-yn jumsasaq, búkil balany járdemaqymen qamti alamyz. Biraq qazir múmkin emes. Biz áýeli osy 500 milliard teńgeni muqtaj otbasylarǵa jetkizýge kúsh salýymyz qajet. Óitkeni, qazir 2-3 bala tárbielep otyrǵan jalǵyzbasty ata-analar talapqa sai kelmegeni úshin járdemaqy ala almai otyr. Sondyqtan qoldanystaǵy júieni jetildirý kerek", – dedi áleýmettanýshy Janar Jandosova.
Úkimet áleýmettik tólemderge 2-3 trillion qarajat qarastyryp jatsa, kedeilik deńgeii de aitarlyqtai tómendeýi múmkin eken.
