Búgingi tańda elimizde 237 000 balaǵa erekshe bilim berý qajet bolsa, olarǵa 541 arnaiy mektep bar eken. Sondai-aq 100 240 pedagogikalyq-psihologiialyq túzetý kabineti, 126 PMPK (psihologiialyq-meditsinalyq-pedagogikalyq konsýltatsiia) kabineti jáne aýtizmi bar balalardy qoldaýǵa arnalǵan 12 ortalyq jumys isteidi.
Bul balalar úshin inkliýziia – jai ǵana mektepke barý múmkindigi emes, bul – oqý, damý jáne qurdastarymen qarym-qatynas jasaý, qoǵamdyq jáne mádeni ómirge aralasý múmkindigi.
2021 jylǵy 26 maýsymda Memleket basshysy «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zańǵa qol qoidy.
«Onda erekshe bilim berý qajettilikteri bar balalardyń kádimgi balalarmen, iaǵni normotipikalyq balalarmen birge oqýǵa múmkindigi bolýyn kózdeitin shara qarastyrylǵan bolatyn. Qazir elimizde 1 000-nan astam mektepte inkliýzivti bilim berýdi qoldaý kabinetter ashyldy. Biraq biz ne kórip otyrmyz? Báribir jetispeidi, jyl saiyn úlken ósim baiqalýda», – deidi Oqý-aǵartý ministri Juldyz Súleimenova.
Oqý-aǵartý ministriniń aitýynsha elimizde áli de inkliýzivti bilim alýǵa muqtaj balalar kóp. Qazirgi tańda Qazaqstan boiynsha 10 000 bala erekshe bilimge kezekte tur.
Ministrliktiń derekterimiz boiynsha, qazir 16 PMPK kabinetin, sondai-aq 8 túzetý kabinetin ashý qajet.
«Budan basqa, bul máseleni keshendi túrde qaraý úshin, Memleket basshysynyń Joldaýyn júzege asyrý aiasynda jańa arnaiy mektepter salatyn bolamyz degen jospardy engizip jatyrmyz.
Bul – inkliýzivti bilim berý qamtylǵan arnaiy mektepterdiń jańa formaty. Onda biz úsh tásil bolady dep oilaimyz: bul reabilitatsiia, oqytý jáne bizdiń balalarymyzdy qoldaý. Sondyqtan bul suraq, árine, ministrliktiń baqylaýynda», – dedi Súleimenova óz sózinde.
Inkliýzivti bilim berý salasynda kadr tapshylyǵy da bar kórinedi.
«Búgingi tańda 11 000 arnaiy pedagog jumys isteidi. Biraq biz munyń jetkiliksiz ekenin túsinemiz. Osy kezeńde 9 kolledj qazirdiń ózinde 900-den astam defektologty daiyndap jatyr, sondai-aq 8 kolledj 200-ge jýyq arnaiy pedagogty daiarlaidy.
Aita ketý kerek, arnaiy pedagogtar boiynsha bizde úlken suraq tur. Sonyń ishinde jalaqy máselesi boiynsha suraq shynymen de ózekti. Sondyqtan qazir Quryltai qabyrǵasynda talqylanyp jatqan zań jobasy aiasynda biz inkliýzivti bilim berýmen ainalysatyn pedagogtardyń jalaqysyn qaita qaraýdy qoldaýǵa daiynbyz. Bul suraq baqylaýda, bul suraq jumysy jalǵasýda», – dedi Oqý-aǵartý ministri depýtattyń suraǵyna jaýap berý kezinde.
Aita keteiik, 16 qarashada Quryltaida «Qazaqstan balalary» tujyrymdamasynyń iske asyrylý barysy týraly Úkimet saǵaty ótti. Depýtattar aldynda Oqý-aǵartý ministri Juldyz Súleimenova baiandama jasady. Ol bilim berý uiymdaryndaǵy psihologiialyq qyzmetti transformatsiialaý, balalardyń quqyqtaryn qorǵaý basqarmalarynyń jumysyn damytý, quqyq buzýshylyqtardyń aldyn alý, zorlyq-zombylyqtan zardap shekken balalardy qorǵaý jáne basqa da sharalardyń júzege asyrylý barysy týraly aqparat berdi.