Shyǵys Qazaqstan oblysynyń Zaisan aýdanyndaǵy «Shaǵanoba» arheologiialyq kesheninde kóne obalarǵa zaqym keltirilýi múmkin. Áleýmettik jelide taraǵan aqparatqa bailanysty óńir ákimdigi túsinikteme berdi, dep habarlaidy ult.kz.
Ákimdik málimetinshe, 13 qarashada politsiia qyzmetkerleri oqiǵa ornyna baryp, keshen aýmaǵyndaǵy qazylǵan shuńqyrlardyń SRS JShS-ne tiesili tehnikamen kómilgenin anyqtaǵan. Oqiǵaǵa qatysy bar azamattardyń kim ekeni anyqtalyp, materialdar politsiiada tirkelgen.
Sol kúni arheologtar, tarihi-mádeni murany qorǵaý mamandary, ákimdik pen politsiia ókilderi aýmaqty teksergen. Jer qazý izderi foto jáne beinetaspaǵa túsirilip, tiisti akt jasalǵan.
Alaida qar jamylǵysyna bailanysty kóne obalardyń naqty jaǵdaiy men keltirilgen zalal kólemin ázirge anyqtaý múmkin bolmaǵan. Sondyqtan 2027 jyldyń kókteminde qaita tekserý júrgizilip, qajet bolsa, avariialyq-qutqarý arheologiialyq jumystary uiymdastyrylady.
Ákimdik tekserý materialdaryn quqyq qorǵaý organdaryna joldaýdy tapsyrǵan. Zań buzýshylyq anyqtalǵan jaǵdaida kináliler jaýapqa tartylmaq. Qazir tarihi eskertkishterge baqylaý kúsheitilgen.
Sonymen qatar oblys ákimdigi kóne qorǵandardyń tarihi kelbetin saqtai otyryp, aýmaqta ashyq aspan astyndaǵy mýzei keshenin qurý múmkindigin qarastyryp jatyr. Bul bastama ázirge kelisý satysynda.
Ákimdik ókilderi tarihi muraǵa qol suǵýǵa jol berilmeitinin jáne jaǵdai baqylaýda ekenin málimdedi.